Lélegt á handfærin í Breiðafirði

Handfæraafli í Breiðafirði er ekki svipur hjá sjón í ár miðað við sama tíma í fyrra. Þorskaafli í maí hefur á undanförnum árum verið góður og margir bátar í dagakerfi náð sínum besta afla í þeim mánuði. Að sögn Marteins Karlssonar í Ólafsvík á Magnúsi Árnasyni SH er langt síðan hann man eftir svo lélegum aflabrögðum í maí eins og nú hefur verið. Í fyrra veiddi hann 25 tonn í maí en er nú aðeins kominn með 2,5 tonn. Tíðarfarið hefur verið erfitt, en áhyggjuefnið er að nú er miklu minna af þorski á slóðinni heldur en verið hefur sl. ár. Marteinn bætti við að áberandi væri hvað grunnið væri dautt, hvorki síli né fugl sýnilegt.