Breiðafjörður – breytingar á lífríkinu

Trillukarlar á Breiðafirði hafa orðið varir við miklar breytingar á lífríki fjarðarins samfara hækkandi hitastigi sjávar. Auk þess sem skelin er horfin er krabbinn alveg hættur að sjást í grásleppunetunum, en allt fullt af krossfiski. Þá er algengt að skötuselur og tindabikkja komi í netin sem grásleppukarlar kannast ekki við að áður hafi gerst. Glöggir menn taka og eftir því að nú er meira um súlu en áður hefur verið sem er ávísun á að síld sé á slóðinni. Ólafsvíkingar hafa orðið varir við góðar síldartorfur og dæmi eru um að Hómarar hafi fengið silfurgláandi demantssíld á handfæri.