Grásleppuveiðar byrja í Faxaflóa og Breiðafirði

Á morgun 1. apríl verður heimilt að hefja grásleppuveiðar í Faxaflóa og í utanverðum Breiðafirði. Að sögn Skarphéðins Árnasonar trillukarls á Akranesi, sem fagnaði áttræðisafmæli sínu í dag, kvaðst hann ekki vera viss um að hann legði netin í fyrramálið. Hann sagðist mundu verða á veðurvaktinni í nótt en hætt er við að hann gæti lagst í vestan átt eftir tvo daga og ef það gengur eftir er ekki gott að eiga nýlögð net í sjó.
Eftir morgundaginn verða veiðar hafnar á öllum veiðisvæðum nema á Vestfjörðum en þar verður heimilt að leggja netin 5. apríl og í innanverðum Breiðafirði en þar má byrja 10. maí.