Landssambandi smábátaeigenda hefur borist eftirfarandi fréttatilkynning frá Sýni skoðunarstofu ehf.
„Þann 1. mars sl. breyttust reglur um skipaskoðun hér á landi. Sama dag fékk Sýni skoðunarstofa ehf. starfsleyfi til reksturs faggiltrar skoðunarstofu á sviði skipaskoðunar á skipum og bátum undir 400 brúttótonnum frá Siglingastofnun. Skipaskoðun var áður á hendi Siglingastofnunar en færist nú yfir til einkarekinna skoðunarstofa.
Þrír skoðunarmenn með víðtæka reynslu á sviði skipaeftirlits hafa verið ráðnir til starfa hjá Sýni á skipaskoðunasviðinu. Það eru þeir Herbert Bjarnason, skipatæknifræðingur, Einar J. Hilmarsson, vélstjóri og Óli Austfjörð, rafvirkjameistari. Sjá mynd
Sýni skoðunarstofa ehf hefur sinnt skoðunum á aðstöðu, hreinlæti og innra eftirliti vinnsluleyfishafa í sjávarútvegi síðan 1998, en þetta nýja svið mun standa útgerðarmönnum til boða og stuðla að einföldun og hagræðingu á skipulagi og tilhögun eftirlits í skipum og bátum þeirra.
Frekari upplýsingar gefa Reynir Þrastarson, framkvæmdastjóri (sími 590-6990, gsm 899-4291, reynir@adalskodun.is ) og Herbert Bjarnason, tæknistjóri (síma 590-6990, gsm 8678628, herbert@adalskodun.is )
Sýni skoðunarstofa ehf er faggild skoðunarstofa á sviði sjávarútvegs og er staðsett á Hjallahrauni. Sýni er dótturfyrirtæki Aðalskoðunar hf. sem rekur bifreiðaskoðun víða um land og sinnir einnig markaðseftirliti með rafföngum og hættulegum vörum.“