Eftir 2 ára niðursveiflu í þorskveiðum við Færeyjar er sá guli aftur farinn að veiðast. Að sögn Auðuns Konráðssonar formanns Meginfelag Útróðramanna hefur að undanförnu veiðst mikið af smáum þorski. Allt lítur út fyrir að verulegt magn sé á ferðinni, líklega sterkur árgangur að koma inn í veiðarnar. Annars hefur tíðin leikið okkur grátt í haust og það sem af er vetri, en á móti kemur að fiskverð hefur sjaldan verið hærra. Það er því sæmilegt+ hljóð í okkur nú“ sagði Auðunn.
Auðunn sagði þorskveiðina nú ekki koma sjómönnum á óvart þó fiskifræðingar hefðu spáð viðvarandi þorskleysi næstu árin. Samtímis hefðu þeir gagnrýnt stjórnvöld í Færeyjum fyrir að hunsa tillögur Alþjóðahafrannsóknaráðsins. „Færeyingar hlusta jú á ráðið og hafa alltaf gert en sjaldnast farið eftir þeirra ráðum. Við erum vanir sveiflum í veiðum og förum því ekki á taugum þó það tregist, hvað þá að okkur detti í hug að banna veiðar á tilteknum tegundum. Færeyingar rekja þessar sveiflur til náttúrunnar og meðan við heimilum ekki togveiðar innan 12 mílna þá er ástæðulaust að óttast að veiðar á grunnslóð valdi því að ekki fæst bein úr sjó“, sagði Auðunn Konráðsson.
Þetta kemur mér ekki á óvart en hér er pistill sem ég birti á heimasíðu minni frá sumrinu 2005 og þar sem ég fjalla um ferð mína til Færeyja og ráðgjöf Jóns Kristjánssonar til færeyskra stjórnmálamanna og hagsmunaaðila.
Mánudagur 20. júní 2005
Góð ferð til Færeyja
Í Færeyjum notaði ég tímann vel og ræddi við fjölmarga sem tengjast sjávarútveginum. Það er greinilegt að margir sem tengjast sjávarútveginum hafa mjög miklar efasemdir um stjórnun á fiskveiðum með einhverri fiskatalningu líkt og Alþjóðahafrannsóknaráðið og Hafró gera og treysta mun betur á stjórnun sem byggist á líffræðiþáttum, s.s. fæðu og vexti fiska.
Það var mjög gagnleg ferð sem ég fór á vegum Vestnorræna ráðsins til Færeyja. Ráðstefnan sjálf skilaði ekki mjög miklu að mínu mati þar sem ég er jafn litlu nær eftir sem áður um hvað og hvernig þjóðirnar þrjár ætluðu að hafa samstarf í sjávarútvegsmálum.
Við Jón Kristjánsson fiskifræðingur áttum hins vegar afar gagnlegan fund með Jákup Sólstein og Óla Jacobsen þar sem farið var yfir nýja „ráðgjöf“ Alþjóðahafrannsóknaráðsins, ICES. Jákup Sólstein er forvígismaður samtaka færeyskra útgerðarmanna og Óli er formaður færeyskra sjómannasamtaka. Farið var yfir nýja ráðgjöf Alþjóðahafrannsóknaráðsins og síðan nýja veiðiráðgjöf færeysku Fiskirannsóknastofunnar en hún virðist vera í litlu samræmi við 50% niðurskurðarráðgjöf Alþjóðahafrannsóknaráðsins.
Færeyingar eru orðnir vanir dómsdagsspám Alþjóðahafrannsóknaráðsins og taka alla jafna lítið mark á ráðinu þar sem það hefur ítrekað sýnt sig að ráðgjöfin hefur verið röng.
Jákvæðar fréttir frá Fiskirannsóknastofunni
Á fundinum var einnig farið yfir nýja skýrslu um vistkerfi hafsins við Færeyjar. Í skýrslunni kveður við alveg nýjan tón og er sjónum beint að líffræði hafsins en ekki horft blint á talningu á fiskum í hafinu eins og ráðgjöf Alþjóðahafrannsóknaráðsins og Hafró gera. Í skýrslunni er tekið að miklu leyti undir það sem Jón Kristjánsson hefur bent ítrekað á, að ekki sé samband á milli stórs hrygningarstofns og mikillar nýliðunar, en hins vegar sjá fiskifræðingarnir skýrt samband á milli mikillar nýliðunar og góðra vaxtarskilyrða þorsks.
Umræðan í Færeyjum um fiskveiðistjórn er með allt öðrum hætti en ætla má af umfjöllun íslenskra fjölmiðla. Það er greinilegt að þeir fjölmörgu sem tengjast sjávarútveginum lýsa yfir mjög miklum efasemdum um stjórnun á fiskveiðum með einhverri fiskatalningu líkt og Alþjóðahafrannsóknaráðið og Hafró gera og treysta mun betur á stjórnun sem byggist á líffræðiþáttum, s.s. fæðu og vexti fiska.
Sælir
Þessar fréttir passa vel við það sem ég varð áskynja um í Færeyjum þegar ég var þar í ágúst. Þá töluðu bæði sjómenn og útgerðamenn um að það væri mikið af smáþorski sem var vel haldinn. Aukinheldur var búin að vera fín og vaxandi veiði á ufsa, ýsu og skötusel. Ég skrifa um þetta á heimasíðu minni (www.magnusthor.is). Bestu kveðjur,
Magnús Þór Hafsteinssson, alþ.m.
Þessi frétt virðist vera eitthvert rugl. Samkvæmt hagstofunni í Færeyjum hefur verið landað helmingi minna af smáþorski í Færeyjum í október í ár en í fyrra. Ef allt væri í lagi hefði átt að koma stór árgangur 2005 vegna stóra árgangsins frá 1999 og það er enn smá vonarglæta um að 2005 árgangurinn gefi góða nýliðun um þessi áramót. Það væri alveg eftir útgerðarmönnum að vera farnir að veiða þann eins árs þorsk í stórum stíl en hagstovan hefur allavega ekki skráð mikla löndumn á honum enn. Góðæri í sjónum nú gæti hjálpað þeim árgang og stuðlað að góðri nýliðun um áramótin en það hjálpar ekki ef honum hefur ekki verið hrygnt vegna þess að stórþorskinn (árgang 1999) vantar. Seiðarannsóknirar sáu lítið sem ekkert af árgangi 2005 í fyrra og ekki fundust fleiri seiði á ár. Tveggja ára fiski rignir ekki af himnum ofan sama hversu mikil áta er til í sjónum. Þannig er nú samhengið.