Á fundi stjórnar Strandveiðifélagsins Króks 1. apríl 2007 var eftirfarandi
samþykkt:
Stjórn Króks skorar á sjávarútvegsráðherra að auka nú þegar veiðiheimildir í
þorski um 25 - 30 þúsund tonn.
Stjórnin harmar andvaraleysi fiskifræðinga á því góðæri sem ríkt hefur á
undanförnum árum í lífríki sjávar. Þorskur er um allan sjó, vel haldinn og af
öllum stærðum. Á það ekki síst við árganga þar sem nýliðun er sögð léleg og er forsenda þess hræðsluáróðurs sem beitt hefur verið í látlausri niðurskurðaráráttu Hafrannsóknastofnunar.
Stjórn Króks bendir á að mokveiði er búin að vera í öll veiðarfæri, allt í
kringum landið undanfarin misseri. Síðustu mánuðir eru þar engin undantekning þrátt fyrir spár fiskifræðinga.
Þessar staðreyndir blasa við á sama tíma og þorskur er í auknum mæli veiddur
sem meðafli. Við veiðar á öðrum tegundum tekst ekki að forðast metveiði á
honum.
Tryggvi Ársælsson formaður
Hafþór Jónsson
Hjörleifur Guðmundsson
Það gengur hvorki né rekur í að byggja upp þorskstofninn enda stangast sú uppbygging á við hefðbundin raunvísindi. Ef menn trúa því á annað borð að hægt sé að byggja upp fiskistofna, þá er glórulaust að byggja upp alla fiskistofna samtímis sem lifa hverjir á öðrum s.s. loðnu og þorsk.
Það hafa ekki borist neinar fréttir úr togararalli Hafró sem er árleg vor talning fiska á Íslandsmiðum en það verður einkar athyglisvert að bera niðurstöðu Hafró um fjölda fiska í hafinu við Ísland við þau góðu aflabrögð sem hafa verið upp á síðkastið.
Haustrallið gaf hins vegar til kynna að þorskstofninn væri á niðurleið og einn helsti sérfræðingur Hafró í þorskmælingum, Björn Ævar Steinarsson gaf sl. haust skýrt til kynna að það væri hætta á algjöru hruni ef haldið yrði áfram með sömu sókn í þorskstofninn. Hafró hefur síðan fundað og boðað enn frekari niðurskurð á aflaheimildum og sömuleiðis breytingar á stórfurðulegri 25% aflareglu sem segir til um hve mikið á að veiða úr veiðistofni árlega. Sú regla byggir ekki á nokkurri líffræði.
Davíð Oddsson átti það til að finna fisk rétt fyrir kosningar og verður fróðlegt að fylgjast með því hvort að Einar Kristinn Guðfinnsson verði jafn fundvís nú skömmu fyrir kjördag.
Eitt er víst að fyrstu niðurstöður úr togararallinu liggja nú þegar fyrir og þess vegna er fátt sem skýrir það hvers vegna þær eru ekki birtar.