Elding skorar á sjávarútvegsráðherra að standa við fyrri yfirlýsingar - Landssamband smábátaeigenda

Elding skorar á sjávarútvegsráðherra að standa við fyrri yfirlýsingar


Stjórn Eldingar kom saman til fundar 1. desember sl. Tilefnið var það myrkur sem skollið er á í sjávarútvegi á Vestfjörðum. Í lok fundar var samþykkt eftirfarandi ályktun:


Óráðlegt að þorskkvótinn fari niður fyrir 200 þús. tonn

„Elding leggur til að þorskkvótinn verði þegar í stað aukinn í 220.000 tonn og skorar á sjávarútvegsráðherra að standa við fyrri yfirlýsingar um að óráðlegt sé að þorskkvótinn fari niður fyrir 200.000 tonn.“


5 ára bölsýnisáætlun Hafrannsóknastofnunar

„Elding mótmælir harðlega að Hafró áætli stofnstærð þorsks 5 ár fram í tímann, í fyrsta lagi getur Hafró ekki metið stofnstærð af neinu viti, stofnstærðarmatið núna er ekki í neinu samræmi við reynslu sjómanna og einnig vegna þess að mjög margt getur breyst á 5 árum.“


Gámaívilnun stórskaðar atvinnu og byggð í landinu

„Elding mótmælir því að gámaálag hafi verið tekið af, rannsóknir hafa sýnt að fiskurinn léttist um 7% á leiðinni til Evrópu, í raun er þetta því 7% gámaívilnun. Gámaívilnun þessi er til stórskaða fyrir atvinnu og byggð í landinu.


Þá mótmælir Elding öllum trollveiðum innan við 12 mílur.

Elding félag smábátaeigenda á norðanverðum Vestfjörðum.
Stjórnarfundur 1. desember 2007“


Formaður Eldingar er Gunnlaugur Finnbogason

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...