Smábátafélag Reykjavíkur - „Stuðningur við handfæraveiðar er stuðningur við sjávarbyggðir“

Aðalfundur Smábátafélags Reykjavíkur var haldinn 29. september sl. í húsnæði félagsins í Grófinni - Verbúð 5.

Fundurinn var líflegur og fjölmargt sem bar á góma.  Í skýrslu formanns, Garðars Berg, kom m.a. fram að náðst hefði langþráð markmið félagsins að útbúin yrði upptökubraut á svæði félagsins.  Hún er nú komin í gagnið en sökum þess að ekki var haft samráð við væntanlega notendur við smíði hennar er hún hin mesta vansmíð og minnst 5 aðila þörf til að hjálpa við upptöku og sjósetningu.  Þrátt fyrir að ítrustu varkárni sé gætt eru skemmdir algengar á bátum og einnig geta aðstæður verið hættulegar.  Krafa félagsins er að framkvæmdin verði tafarlaust lagfærð. 

Bátar í eigu félagsmanna sem lönduðu afla á sl. ári voru 53.

Aðalfundur Smábátafélags Reykjavíkur samþykkti eftirfarandi tillögur:

• Handfæraveiðar hafa orðið fyrir mestri skerðingu, þar sem aflaheimildir þeirra eru nær eingöngu í þorski. Stuðningur við handfæraveiðar er stuðningur við sjávarbyggðirnar.  Hér gilda því sömu rök og eiga við um línuívilnun.  Það yrði vonandi til að halda í þessa fáu báta sem eftir eru.  Það er líka ástæða fyrir okkur að varðveita verkþekkingu og þekkingu á lífríki og veiðimynstri á grunnsævi hvers staðar sem annars gæti glatast.

• Standa vaktina gagnvart svonefndum vottunarsamtökum eins og t.d. MSC.

• Standa vörð um óbreyttan slægingarstuðul.

• Aðför að atvinnuréttindum mótmælt.  Ekki komi til greina að heimilt sé að svipta skipstjórnarmenn  30 tonna réttindunum hafi þeir ekki verið við skipstjórn í 5 ár. 

• Byggðakvóti að úthlutunarreglur verði ekki þær sömu fyrir handfæra- og línubáta vegna ólíkrar aflasamsetningar.

• ·           Jafnstöðuafla 220 þús. tonn í 2 - 3 ár.                                                                              

           Greinargerð:  Sjómenn eru vissir um að mikið sé af þorski í sjónum.  Hafró er á öðru máli. Látum þjóðina njóta vafans.  Nú vantar lífsnauðsynlega gjaldeyrir og það fljótt.

Í lok fundar var stjórnarkjör.  Allir stjórnarmenn gáfu kost á sér og voru endurkjörnir með kröftugu lófataki.

Stjórn Smábátafélags Reykjavíkur:

            Garðar Berg Guðjónsson formaður

            Þorvaldur Gunnlaugsson varaformaður

            Konný Breiðfjörð Leifsdóttir ritari

            Jón F. Magnússon gjaldkeri

            Guðmundur Jónsson meðstjórnandi