Auðlindin endurvakin - Landssamband smábátaeigenda

Auðlindin endurvakin



 

 Auðlindin hefur göngu sína á ný í Útvarpinu miðvikudaginn 12. nóvember næstkomandi.  Þátturinn verður með breyttu sniði og á nýjum tíma.  Hann verður sendur út að loknum kvöldfréttum í Útvarpinu, á báðum rásum, klukkan 18:15 og verður um sjö mínútur að lengd.  Auðlindin verður helguð íslensku atvinnulífi með sérstakri áherslu á framleiðsluatvinnuvegina sem og nýsköpunar- og sprotafyrirtæki.

 

Ekkert úr atvinnulífinu verður Auðlindinni óviðkomandi, þar verður fjallað um sjávarútveginn, sem ætla má að fái verðugan sess hvern dag, um landbúnað, iðnað, ferðaþjónustu, stóriðju, orkuframleiðslu, hvaðeina sem færir þjóðfélaginu tekjur og styrkir innviði samfélagsins.

 

Þátturinn verður á dagskrá alla virka daga, umsjónarmenn verða Þórhallur Jósepsson fréttamaður í Reykjavík og Karl Eskil Pálsson fréttamaður á Akureyri. Ýmsir pistlahöfundar leggja Auðlindinni lið, þar fara fremstir í flokki Gísli Einarsson sem verður landbúnaðarsérfræðingur Auðlindarinnar, og Gísli Kristjánsson sem flytur tíðindi frá Noregi og öðrum nálægum löndum.


Auðlindin þiggur með þökkum ábendingar um hvaðeina sem frásagnarvert gæti verið. Hægt er að hafa samband við umsjónarmenn í símum 515 3050 og 515 3030 í Reykjavík og 464 7000 á Akureyri. 


Netfangið er audlindin@ruv.is




Landssamband smábátaeigenda fagnar því sérstaklega að RÚV skuli endurvekja Auðlindina, en mikil eftirsjá var í henni á sínum tíma.  Þrátt fyrir fjölmargar ályktanir og áskoranir tókst ekki að fá RÚV til að endurskoða ákvörðun sína þá.   En nú hefur verið gerð breyting á, Auðlindin fer í loftið nk. miðvikudag 12. nóvember og verður uppfrá því á hverjum virkum degi kl 18:15.

 


 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...