Miklar sveiflur í afla á fyrsta þriðjungi fiskveiðiársins - Landssamband smábátaeigenda

Miklar sveiflur í afla á fyrsta þriðjungi fiskveiðiársins


  

Það vekur athygli hvernig fiskveiðiflotinn hefur beitt sér í einstaka tegundum á fyrsta þriðjungi fiskveiðiársins samanborið við sama tíma árið 2007.   Þar má meðal annars sjá að ýsuafli krókaaflamarksbáta er 79% meiri en hjá togaraflotanum eða sem nemur tæpum fimmþúsund tonnum. 

 

Krókaaflamarksbátar auka verulega við þorskafla sinn eða um 47%, 2.404 tonn.  Það sama er upp á teningunum í ýsu, aukning um 15%, 1.441 tonn.  

 

Ýsuafli togara er hins vegar ekki svipur hjá sjón nú miðað við 2007, hann minnkar um 56%, eða um átta þúsund tonn.  Þorskurinn fer einnig niður hjá þeim eða um 13%, 3.104 tonn. 

Á hinn bóginn er veruleg aukning í karfa hjá togurum eða sem nemur 7.418 tonnum, 111% aukning milli fyrstu þriðjunga fiskveiðiáranna. 

Gulllax veiðist sem aldrei fyrr hjá togurum, virðist hafa verið vannýtt auðlind.   Alls 4.521 tonn veidd nú á móti 548 tonnum á sama tímabili sept - des. 2007.

 

Einnig vekur athygli, þegar rýnt er í bráðabirgðatölur Fiskistofu sem þessar upplýsingar eru unnar upp úr, að samdráttur er 2.184 tonn í ýsuafla aflamarksskipa - 16%.  Þau hafa hins vegar bætt við sig í þorski miðað við 2007, aflinn nú er 38% meiri, 5.304 tonn.  Þá er yfir 100% aukning í ufsanum, 2.730 tonn. 

 

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...