Milljónatjón hjá grásleppuveiðimönnum - Landssamband smábátaeigenda

Milljónatjón hjá grásleppuveiðimönnum


 

Foráttubrim í síðustu viku olli gífurlegu tjóni á veiðarfærum grásleppukarla á N- og NA-landi. 

Hún var ömurleg aðkoman hjá grásleppuveiðimönnum um nýliðna helgi þegar loks var hægt að vitja netanna eftir langvinna ótíð.  Þrátt fyrir að netin lægju á meira en 30 faðma dýpi sluppu þau ekki.  Hafrótið náði þar niður og þyrlaði grjóti og öðrum ófögnuði af botninum og lamdi í sundur.       Einnig hefði fiskur lent í netunum og vafið þau þannig upp að brimið vann enn betur á þeim og gerði þau með öllu ónothæf.


„Það er grátlegt að vera kominn í land með ónýt net eftir aðeins 3 vikna notkun.   Góð afkoma síðastliðins árs er fokin út í veður og vind í bókstaflegri merkingu.   Það er harla ólíklegt að þau örfáu net sem sluppu geri mönnum kleift að jafna þann reikning.                                                

Ætli þessi bræla skráist ekki í sögubækur sem „stóra milljónabrælan“.  Aldrei þessu vant blasti við okkur nægur markaður og hærri verð en menn hafa nokkru sinni séð,  sagði Einar Sigurðsson grásleppukarl á Raufarhöfn. 


Að sögn Gunnars Gunnarssonar á Húsavík eru grásleppuveiðimenn þar sammála um að fara þarf allt aftur til ársins 1984, aldarfjórðung, til að finna hamfarir sem þessar.   


 IMG_0035.jpg

Tekið á bryggjunni á Húsavík í dag


  

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...