Strandveiðifrumvarpið komið fram

Í dag mælti sjávarútvegs- og landbúnaðarráðherra Jón Bjarnason fyrir frumvarpi til laga um breytingar á lögum um stjórn fiskveiða.   Í bráðabirgðaákvæði I í frumvarpinu er fjallað um strandveiðar.  Þar er gert ráð fyrir að stunda megi handfæraveiðar síðustu þrjá mánuði þessa fiskveiðiárs án þess að aflinn teljist til kvóta. 

Sækja má alla daga utan laugardags og sunnudags.  Hver róður má að hámarki standa í 12 klst og ekki má veiða meir en 800 kg af þorski í hverri veiðiferð.  Rói menn einir mega þeir nota 2 handfærarúllur og að hámarki 4 ef fleiri eru um borð.

Samkvæmt frumvarpinu er landinu skipt í fjögur veiðisvæði og þeim 3.955 tonnum (2.500 tonn aukaúthlutun og  1.455 tonn úr byggðakvóta) sem ætlaðar eru til veiðanna deilt niður á þau.  Skiptingin er eftirfarandi:

A.            Eyja- og Miklaholtshreppur - Skagabyggð                                1.316 tonn

B.            Sveitarfélagið Skagafjörður - Grýtubakkahreppur                        936 tonn

C.            Þingeyjarsveit - Djúpavogshreppur                                         1.013 tonn

D.            Sveitarfélagið Hornafjörður - Borgarbyggð                                  690 tonn

Í frumvarpinu er ákvæði um að hefji menn strandveiðar þá fellur veiðileyfi í atvinnuskyni niður það sem eftir er fiskveiðiársins.

Sjá nánar frumvarpið