Mjög léleg grásleppuveiði á Nýfundnalandi - Landssamband smábátaeigenda

Mjög léleg grásleppuveiði á Nýfundnalandi


Þriðja árið í röð virðist grásleppuvertíðin við Nýfundnaland ætla að bregðast.  Nýfundnalendingar voru til skamms tíma með mestu veiði þeirra landa sem nýta þá gráu.  Nú er öldin önnur og allt stefnir í að vertíðin 2009 verði ein sú lélegasta í manna minnum frá því atvinnuveiðar hófust þar um 1978.
  
Vertíðin árið 2002 var sú herfilegasta frá upphafi.  Það ár gaf veiðin aðeins rúmar 1 þúsund tunnur af hrognum.  Tveimur árum síðar var veiðin hins vegar yfir 15 þúsund tunnur sem er ótrúleg veiði, sé haft í huga að vertíðin stóð aðeins í 15 daga á hverju svæði.  
Samkvæmt upplýsingum fyrr í dag frá veiðimannasamtökunum á Nýfundnalandi stefnir allt í að veiðin verði um 2000 tunnur í ár.  

Frá Noregi berast þær fréttir að veiðin sé rúmlega helmingur þess sem var á síðasta ári.  Enn hafa ekki borist tölur frá Grænlandi, en óstaðfestar fréttir herma að þar sé einhver samdráttur frá síðasta ári.

Á Íslandi er um 10% minni veiði í ár miðað við sama tíma í fyrra, eða um 8900 tunnur sem þetta er ritað.  Það er engu að síður vel viðunandi, því vertíðin 2008 gaf mestu veiði frá upphafi, miðað við fjölda neta í sjó.     

027.jpg

Úti fyrir Ströndum 2008

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...