Skötuselur - stjórn LS óskar eftir rýmri heimildum - Landssamband smábátaeigenda

Skötuselur - stjórn LS óskar eftir rýmri heimildum



Stjórn Landssambands smábátaeigenda hélt árlegan sumarfund í Grundarfirði 21. og 22. júlí sl.  Fjölmargir dagskrárliðir lágu fyrir fundinum sem verður gerð skil hér á heimasíðunni á næstu dögum.

Meðal umræðuefna voru veiðar á skötusel.  Niðurstaða fundarins var eftirfarandi:

„Fundur í stjórn LS haldinn í Grundarfirði 21. júlí skorar á Jón Bjarnason sjávarútvegs- og landbúnaðarráðherra að auka nú þegar leyfilegan heildarafla á skötusel um 1000 tonn.  Ennfremur beinir fundurinn þeim tilmælum til hans að hann breyti reglum um meðafla við grásleppuveiðar þannig að skötuselur teljist ekki til kvóta við þær veiðar.

Stóraukin útbreiðsla skötusels hefur leitt til vandamála við grásleppuveiðar.  Skötuselur ásælist grásleppuna og lendir í auknum mæli sem óæskilegur afli við veiðarnar.  Flestir grásleppubátar hafa ekki veiðiheimildir í skötusel enda hefur það verið nánast óþekkt að hann veiðist í grásleppunet.  Nú hefur hins vegar orðið breyting á og því brýnt að taka á þeim vanda með því að hann teljist ekki til kvóta við þann veiðiskap.

Ennfremur er bent á að skötuselur er ránfiskur og því réttlætanlegt að veiði á honum sé töluvert umfram það sem Hafrannsóknastofnun leggur til.“

 

 

Þess má geta að 10. júlí sl. sendi sjávarútvegs- og landbúnaðarráðherra Jón Bjarnason frá sér fréttatilkynningu þar sem m.a. var fjallað um skötusel.  Þar segir eftirfarandi:

„Varðandi skötusel skal það tiltekið að sjávarútvegs- og landbúnaðarráðherra Jón Bjarnason hefur ákveðið aflahámark er svarar til 2.500 tonna sem er í samræmi við tillögur Hafrannsóknastofnunarinnar. Ráðherra tekur þó fram að hann hefur í hyggju að skoða aðrar leiðir til viðbótar varðandi fiskveiðistjórn í skötusel. Veruleg breyting hefur orðið á útbreiðslu skötusels hér við land á þessum áratug. Veiðslóðin var í áratugi aðallega við mið- og austurhluta suðurstrandarinnar og á þeim grunni var upphafs aflahlutdeild úthlutað. Nú hefur þessi veiðislóð í vaxandi mæli færst á Vesturmið og jafnvel norður. Þetta hefur jafnframt þýtt að skötuselur hefur í vaxandi mæli komið fram sem meðafli við grásleppuveiðar á grunnsævi í Breiðafirði og Ísafjarðardjúpi. Sjávarútvegs- og landbúnaðarráðherra, Jón Bjarnason, mun vegna þessa leggja fram frumvarp til breytinga á lögum um stjórn fiskveiða á haustþingi þar sem á þessum atriðum og fleirum verður tekið með almennum hætti. Jafnframt hefur ráðherra í hyggju að setja reglugerð um umgengni við þennan stofn þar sem að tekið verður fyrir fjöldi neta á bát, vitjunartími neta og fleira því skylt.“ 

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...