Stjórn LS - milljarða eftirgjöf skulda gangi einnig til heimila og fyrirtækja - Landssamband smábátaeigenda

Stjórn LS - milljarða eftirgjöf skulda gangi einnig til heimila og fyrirtækja



Á fundi stjórnar LS 21. og 22. júlí urðu miklar umræður um stöðu smábátaútgerðarinnar gagnvart lánastofnunum.  Í kjölfar bankahrunsins gáfu stjórnvöld þau tilmæli til lánastofnana að þau frystu lán til allt að tveggja ára án nokkurs kostnaðar né breytinga á skilmálum.  Það gekk snurðulaust hjá yfirteknu bönkunum og einnig voru spariðsjóðirnir liðlegir. 


Nokkuð var um að félagsmenn kusu skemmri tíma en 2 ár, töldu að ástandið mundi vera orðið viðunandi innan hálfs árs. Því miður hefur slíkt ekki orðið raunin og því hafa smábátaeigendur farið fram á áframhaldandi frystingu til allt að 18 mánaða og skírskotað máli sínu til stuðnings til tilmæla stjórnvalda.

 

Lánastofnanir hafa brugðist misvel við.  Dæmi eru um að krafa hefur verið gerð um skilmálabreytingar svo sem tugaprósenta hækkun vaxtaálags og myntbreytinga, jafnvel gengið svo langt að lánveitandi geti hvenær sem er breytt láninu í íslenskar krónur.

 

Mikil óánægja hefur verið meðal smábátaeigenda með slíkt og hefur LS með formlegum hætti kvartað til stjórnvalda vegna þessara framkomu  yfirteknu bankanna og sparisjóða.  LS hefur hvatt smábátaeigendur til að samþykkja hvorki skilmálabreytingar né hækkun á vaxtaálagi.

 

 

Af þessu tilefni samþykkti stjórn LS eftirfarandi:

 „Stjórn LS skorar á ríkisstjórn Íslands að tryggja gegnsæi í samningum um afskriftir lántakenda gagnvart lánveitendum.  Einnig kallar stjórn LS eftir skýrum reglum opinberra kröfuhafa gagnvart heimilum og fyrirtækjum.   LS krefst þess að heimili og fyrirtæki fái viðunandi lausn á skuldastöðu sinni sem skapast hefur vegna bankahruns jafnt og ofurskuldsett fyrirtæki sem endurreist eru með milljarða eftirgjöf skulda.“

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...