Aðalfundur Skalla - fagnar strandveiðum - vill fjölga veiðidögum á grásleppu - Landssamband smábátaeigenda

Aðalfundur Skalla - fagnar strandveiðum - vill fjölga veiðidögum á grásleppu


  

Aðalfundur Skalla var haldinn í gær.  Ágæt mæting var á fundinn og umræður  líflegar.  Auk hefðbundinna aðalfundarstarfa var í kjölfar skoðanaskipta samþykktar ályktanir.

Meðal þeirra voru eftirfarandi:


Strandveiðar - Aðalfundur Skalla fagnar strandveiðum og telur þær til hagsbóta fyrir félagsmenn á sínu svæði, sem er frá Hvammstanga til Siglufjarðar.  Stjórnin hvetur sjávrútvegs- og landbúnaðarráðherra til að beita sér fyrir því að strandveiðar verði festar í sessi sem sérstakt veiðikerfi, óháð veiðiheimildum til króka- og aflamarks, á tímabilinu maí til ágúst ár hvert.

Skalli telur það afleita ákvörðun að færa veiðiheimildir úr byggðakvóta í strandveiðikerfið.  Veiðiheimildir til strandveiða verði viðbót við áður úthlutaðan kvóta og dragist ekki frá veiðiheimildum þeirra sem eru háðir króka- og aflamarki. 

 

Niðurskurður í þorsk, ýsu og ufsa óásættanlegur - Aðalfundur Skalla harmar ákvörðun sjávarútvegsráðherra um niðurskurð aflaheimilda á þorski, ýsu og ufsa á fiskveiðiárinu 2009/2010 og bendir á tillögur Landssambands smábátaeigenda í því sambandi þar sem gert er ráð fyrir 200 þús. tonnum af þorski og 80 þús. tonnum af ýsu og veiðiheimildir í ufsa verði óbreyttar 65 þús. tonn.

DSC03130.JPG

                       

Línuívilnun  -  Aðalfundur Skalla haldinn á Sauðárkróki 16. september 2009 hvetur stjórnvöld til að standa vörð um línuívilnun og breyta reglum þannig að hún taki einnig til þeirra báta þar sem línan er stokkuð upp í landi.

                     

Byggðakvótinn  -  Aðalfundur Skalla haldinn á Sauðárkróki 16. september hvetur stjórnvöld til að standa vörð um byggðakvótann.

Ennfremur leggur fundurinn til að stjórnvöld breyti reglum um byggðakvóta þ.a. aflétt verði skilyrðum um vinnsluskyldu í heimabyggð og ákvæði um tvöföldunarskyldu.

Auk þess hvetur aðalfundur Skalla til að byggðakvóta verði úthlutað í upphafi hvers fiskveiðiárs.

 

Grásleppa - Skalli leggur til að fjöldi veiðidaga á svæði E á vertíðinni 2010 verði 70 innan tímabilsins 1. mars  -  29. maí. 

 

Sjómannaafsláttur - Aðalfundur Skalla hvetur stjórnvöld til að standa vörð um sjómannaafsláttinn.

 

Fagna endurskoðun laga um stjórn fiskveiða -  Aðalfundur Skalla haldinn á Sauðárkróki miðvikudaginn 16. september 2009 fagnar ákvörðun stjórnvalda um endurskoðun á stjórnun fiskveiða og vonar að með þeirri endurskoðun verði bundinn endi á það óréttlæti sem viðgengist hefur síðan þessu kerfi var komið á. 

Þá vonar Skalli að endurskoðunin leiði til þess að auðvelda nýliðun í greininni og þau sjávarpláss sem verst hafa orðið úti vegna afleiðinga núverandi kerfis njóti góðs af þessari endurskoðun.

Þá harmar fundurinn þau vinnubrögð sem viðhöfð hafa verið við leigu aflaheimilda þar sem leiguverð á þorski hefur oft á tíðum verið um og yfir markaðsverði.

 

Skötuselur - Aðalfundur Skalla hvetur sjávarútvegsráðherra að breyta reglum um skötuselsveiðar þannig að skötuselur sem meðafli við grásleppuveiðar reiknist ekki til króka- eða aflamarks.

 

Stjórn Skalla var endurkjörin en hana skipa eftirtaldir:

Sverrir Sveinsson formaður                    Siglufirði

Eðvald Daníelsson varaformaður             Hvammstanga

Steinn Rögnvaldsson gjaldkeri                Skaga

Sigurjón Guðbjartsson meðstjórnandi        Skagaströnd

Steinar Skarphéðinsson meðstjórnandi     Sauðárkróki

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...