Aðalfundur Smábátafélags Reykjavíkur - borgaryfirvöld standi vörð um útgerð smábáta

Á aðalfundi Smábátafélags Reykjavíkur kom fram megn óánægja með áhugaleysi borgaryfirvalda um sterka smábátaútgerð í Reykjavík.  Smábátaeigendur hafa verið beittir þrýstingi um að færa alla starfsemi sína úr Grófinni yfir á Granda.  Aðalfundur Smábátafélags Reykjavíkur telur að slíkt muni skaða miðbæjarímynd borgarinnar.  Borgaryfirvöld eru hvött til að hafa samráð við Smábátafélag Reykjavíkur við allar breytingar á skipulagi sem lúta að aðstöðu smábátaútgerðarinnar í borginni.

Fundurinn fjallaði um fjölmörg önnur mál og samþykkti ályktanir þeim tengd.

Meðal þeirra var að skora á stjórnvöld að heimila 220 þús. tonna árlega veiði á þorski næstu 2 til 3 árin. 

Til mótvægis verði dregið úr álagi á grunnslóðina með því að færa botndregin veiðarfæri fjær landi.   Á grunninu verður meiri skaði þegar búið er að slóðadraga botninn, en á dýpri sjó.   Því að áhrif strauma og storma gætir ólíkt meira á grunninu en utar í dýpri sjó.  Á grunninu verður til mikið af fæðu fiskstofna og gróður sem skýlir ungviði.

Þá lýsti fundurinn ánægju sinni með strandveiðar og hvatti til að hámarksafli á dag verði miðaður við 800 þorskígildi. 

Stjórn Smábátafélags Reykjavíkur var endurkjörin, en í henni eru:

Garðar Berg Guðjónsson formaður

Konný Breiðfjörð Leifsdóttir ritari

Jón Friðgeir Magnússon gjaldkeri

Þorvaldur Gunnlaugsson varaformaður

Guðmundur Jónsson meðstjórnandi