Aðalfundur Snæfells - línuívilnun verði efld, hámarksafli mældur í þorskígildum og 1000 tonn meira af skötusel - Landssamband smábátaeigenda

Aðalfundur Snæfells - línuívilnun verði efld, hámarksafli mældur í þorskígildum og 1000 tonn meira af skötusel



Snæfell hélt aðalfund sinn í Grundarfirði 26. september sl.  Góð mæting var á fundinn hjá þessu stærsta svæðisfélagi LS og félagsmenn röskir við að halda fram skoðunum sínum á fjölmörgum málum sem lágu fyrir fundinum.

 

Fundurinn vill að LS beiti sér áfram fyrir eflingu línuívilnunar og að dagsafli við strandveiðar verði takmarkaður við 800 þorskígildi en ekki kílóatölu. 

 

Snæfell leggur mikla áherslu á að aðalfundur LS hafni alfarið inngöngu Íslands í Evrópusambandið.  Ennfremur að hann mótmæli harðlega öllum hugmyndum um afnám sjómannaafsláttar.

 

Snæfell brýnir fyrir aðalfundi LS að hann mótmæli harðlega togveiðum innan 12 mílna landhelgislínu Íslands. 

Í greinargerð segir:  Það er óviðunandi að togveiðar séu stundaðar á grunnslóð á sama tíma og ýsukvótinn er skorinn stórlega niður eins og raun ber vitni.  Snæfell telur þessar veiðar stórskaða ýsustofninn og forsendan fyrir því að efla hann er stöðvun togveiða á grunnslóð.

DSC03207_2.jpg

Gestur Hólm og Bárður  

      

Aðalfundur Snæfells ítrekar fyrri ályktanir um að veiðiheimildir í þorski miðist við 220 þús. tonn.  Mótmælt er gífurlegum niðurskurði í öðrum tegundum.

 DSC03210_2.jpg

Aðalfundur Snæfells skorar á sjávarútvegsráðherra að breyta reglugerð um svæðalokanir fyrir handfæraveiðum.   Í stað lokunar svæða komi tímabundin svipting veiðileyfis hjá þeim sem veiðir of hátt hlutfall af smáfiski.

 

Skötuselur

Mikil umræða fór fram um skötuselsveiðar, en skötuselur hefur flætt yfir veiðisvæði þeirra Snæfells manna á sl. misserum.  Sjávarútvegsráðherra er hvattur til að breyta reglum þannig að skötuselur sem meðafli við grásleppuveiðar reiknist ekki til króka- eða aflamarks.

Þá skorar aðalfundur Snæfells á sjávarútvegsráðherra að auka veiðiheimildir nú þegar um 1000 tonn og deila út á þrjá vegu:

a.            Úthluta 500 tonnum eftir veiðireynslu sl. fiskveiðiárs

b.            330 tonnum verði úthlutað samkvæmt aflahlutdeild

c.            170 tonn verði notað til að mæta meðafla við grásleppuveiðar

 

 Grásleppuveiðar

Aðalfundur Snæfells leggur til að heimilað verði að hafa tvö grásleppuleyfi á einum bát og viðkomandi geti þá stundað veiðar í tvö tímabil.  

 

 

Stjórn Snæfells var öll endurkjörin, en hana skipa:

 

Alexander Friðþjófur Kristinsson formaður  Hellissandi

Gestur Hólm Kristinsson ritari  Stykkishólmi

Jóhann Rúnar Kristinsson gjaldkeri Hellissandi

Bárður Guðmundsson meðstjórnandi Ólafsvík

Heiðar Magnússon meðstjórnandi Ólafsvík

 

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...