Arnar á Ragnari nýr formaður Hrollaugs - Landssamband smábátaeigenda

Arnar á Ragnari nýr formaður Hrollaugs



Hrollaugur á Höfn hélt aðalfund 27. september sl.  Það bar til tíðinda á fundinum að Unnsteinn Þráinsson sem verið hefur formaður félagsins sl. 2 ár gaf ekki kost á sér til endurkjörs.  Nýr formaður var kosinn Arnar Þór Ragnarsson sem jafnframt var tilnefndur sem fulltrúi félagsins í stjórn LS.  Arnari er hér með óskað til hamingju með formannskjörið og velfarnaðar í starfi, um leið og Unnsteini er þakkað fyrir sitt framlag til eflingar smábátaútgerðar á undanförnum árum, bæði sem formaður Hrollaugs og stjórnarmaður í LS.

Kringum Hrollaug hefur skapast afar skemmtileg stemning sem lítur að því að annað hvert ár gera félagsmenn og makar sér dagamun með skemmtiferð út fyrir landsteinana.  Í haust var farið til Valencia á Spáni og er myndin hér tekin við það tækifæri. Sumar 2009 139.jpg


Aðalfundur Hrollaugs lýsti stuðningi við strandveiðikerfið.  Samþykkt var að óska eftir að dagsafli verði miðaður við þorskígildi í stað kílóa.

Hrollaugur vill afnema línuívilnun og byggðakvóta til að skapa meiri sátt innan greinarinnar.

Geymsluréttur verði færður til fyrra horfs, verði 20%.

Hrollaugur vill banna botnvörpuveiðar innan 6 sjómílna frá landi og segir óskiljanlegt að árið 2009 skuli vera leyfðar slíkar veiðar upp að 3 mílum með öflugum togurum með tilheyrandi skaða fyrir lífríkið.

Aðalfundurinn vill að LS beiti sér fyrir því að stórauka makrílrannsóknir við strendur landsins einnig fæðu hans hér við land, hvað hann étur hér og hversu mikið magn.                                                                                                       

Í umræðum kom fram að vissulega væri þó spennandi að fá nýjar tegundir til að veiða.  Aftur á móti er ástæða til að hafa áhyggjur af veru makrílsins hér við land þar sem hann virðist vera í beinni samkeppni um fæðu við þær tegundir sem fyrir eru.

 

Stjórn Hrollaugs er þannig skipuð: 

Arnar Þór Ragnarsson formaður

Unnsteinn Þráinsson gjaldkeri

Friðþór Harðarson ritari

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...