Fyrirspurn til LÍÚ varðandi strandveiðar - Landssamband smábátaeigenda

Fyrirspurn til LÍÚ varðandi strandveiðar



Frá því Landssamband smábátaeigenda var stofnað 1985 hafa ályktanir aðalfunda LÍÚ ekki verið ýkja vinsamlegar í garð smábátaútgerðarinnar. 

 

Nýjasta dæmið er samþykkt aðalfundar LÍÚ í október sl, en hún hljóðaði nokkurn vegin svona:

 

LÍÚ mótmælir því harðlega að svokallaðar strandveiðar hafi tekist vel sl. sumar. Þvert á móti voru þær eins misheppnaðar og efni stóðu til. Strandveiðarnar stuðluðu ekki að nýliðun né bættri aflameðferð, ekki að bættu öryggi sjómanna og stuðluðu alls ekki að sátt um fiskveiðistjórnina. Fundurinn leggur því til að strandveiðar verði ekki heimilaðar áfram og beinir því til sjávarútvegs- og landbúnaðarráðherra að mismunun milli útgerðaflokka sem felst í strandveiðum, línuívilun og byggðakvóta verði hætt.

 

Síðasta setningin er fullyrðing um að meðlimir LÍÚ séu útilokaðir frá strandveiðum, línuívilnun og byggðakvóta.

 

Það er haugalygi.  Strandveiðar, línuívilnun og byggðakvóti stendur félagsmönnum LÍÚ jafnt til boða sem öðrum.  Ástæða þess að þeir notfæra sér ekki tvo fyrst töldu liðina er einfaldlega sú að útgerðir LÍÚ telja ekki hagkvæmt að gera út á þá valkosti.  Hvað þriðja liðinn varðar gegnir öðru og best að viðkomandi stórútgerðir skýri mál sitt án aðstoðar undirritaðs.

 

Hluti þessarar stórbrotnu ályktunar aðalfundar LÍÚ 2009 hljómaði svo: „Þvert á móti voru þær (strandveiðarnar) eins misheppnaðar og efni stóðu til":

 

ÉG (undirritaður) á litla trillu, Dagbjörtu RE 10.  

Þetta er Skel 26, smíðuð 1991, með 53 ha Yanmar vél.

 

Þar sem ég er óforbetranlegur trillukarl í hjarta mínu stóðst ég ekki mátið og setti á dugguna strandveiðileyfi sl. sumar.  Ég fór í 10 róðra út á Faxaflóann þegar best var og blíðast.  Ekki var veiðin beisin.

 

Ég veiddi tæp 2,7 tonn af fiski og eyddi í það um 270 lítrum af olíu, u.þ.b. 0,1 líter á hvert veitt kíló af fiski.  Ég var að veiða á svæði D - lang lélegasta svæðinu fyrir handfæraveiðar við landið á tímabilinu júlí-ágúst.  

 

Mín spurning til forsvarsmanna LÍÚ er þessi:  

Í ljósi þeirrar fullyrðingar að strandveiðarnar hafi verið „eins mislukkaðar og efni stóðu til":  

Hver var olíueyðslan að jafnaði pr kíló af fiski við botnfiskveiðar hjá LÍÚ flotanum frá miðjum júlí til loka ágúst 2009?

 

Arthur Bogason

Formaður Landssambands smábátaeigenda

Þorskur 17. julí 09[1].tiff         






      


 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...