Tilefni þess að vekja athygli á þessum þætti fiskveiðanna eru linnulausar árásir LÍÚ og flestra annarra hagsmunasamtaka í sjávarútvegi á strandveiðar, línuívilnun og fleira er varðar smábátaútgerðina.
Samþykkt aðalfundar LÍÚ 2009 innihélt m.a.:
„LÍÚ mótmælir því harðlega að svokallaðar strandveiðar hafi tekist vel sl. sumar. Þvert á móti voru þær eins misheppnaðar og efni stóðu til".
Í frétt LS var beint fyrirspurn til LÍÚ varðandi olíueyðslu þeirra útgerða á tímabilinu júlí - ágúst sl. Svar hefur ekki borist.
Már Ólafsson, smábátaeigandi á Hólmavík sendi í kjölfar fréttarinnar eftirfarandi upplýsingar sem hljóta að teljast allrar athygli verðar:
„Mér datt í hug af tilefni fréttar á vef LS að skoða olíunotkun 2009. Ég fékk 50 tonn af bolfiski og eyddi 4.157 lítrum sem kostuðu mig kr. 383.854.- án vsk, eða 7,67 kr. pr. kg.
Þegar ég tók grásleppuna með var eyðslan 6.422 lítrar, eða kr. 573.226.- án vsk.
Heildaraflaverðmætið var rúmar 16 milljónir.
Hver lítri af olíu skilaði því 2.491 kr í aflaverðmæti. Við erum að tala um hraðfiskibát - sem á víst að vera olíuhákur.
Gaman væri að bera þetta saman við togveiðarfæri til að sjá verðmætið þar á bak við hvern lítra".
Olíueyðsla Straums ST 65 var því um 3,6% af aflaverðmæti á árinu 2009. Eyðslan pr. kg af bolfiski (4.157 L / 50 tonn) var rúmlega 0,08 lítrar á hvert veitt kg af fiski.
Miðað við það mat LÍÚ að strandveiðarnar hafi verið með öllu misheppnaðar hlýtur útgerð Straums ST 65, sem er krókaaflamarksbátur, að falla í sama flokk.
Það verður fróðlegt að sjá hver olíueyðslan var/er hjá þeim sem svo hart dæma.
Skrifa athugasemd