Strandveiðar og sóun - Landssamband smábátaeigenda

Strandveiðar og sóun



Eftirfarandi grein birtist í Fréttablaðinu laugardaginn 13.febrúar sl:


„Arthur Bogason skrifar um strandveiðar


Hinn 18. nóvember 2009 barst sjávarútvegsráðherra bréf, undirritað af 183 íbúum af rúmlega 500 í Langanesbyggð.  Í bréfinu var komið á framfæri þökkum fyrir strandveiðikerfið og það mikla líf sem það hleypti í hafnir landsins sl. sumar.  Að auki var tilgreint að í Langanesbyggð hefðu um 25 einstaklingar haft beina atvinnu af róðrum í strandveiðikerfinu, auk afleiddra starfa.  Um kæra búbót hefði verið að ræða.

Þetta bréf er einsdæmi í sögu fiskveiðistjórnunar á Íslandi.  Fagnaðarefni í ljósi ástandsins í landinu.

LÍÚ finnur strandveiðunum allt til foráttu og fullyrðir að þær séu sóun verðmæta úr fiskveiðiauðlindinni. Nýútkomin skýrsla Háskólaseturs Vestfjarða um strandveiðarnar sl. sumar sé óræk sönnun þess.

LÍÚ rótast af heilagri vandlætingu í skýrslunni til að finna höggstað á strandveiðunum og telur sig nú þegar hafa borað á gullæð.  Þ.e. kaflann um gæði afla strandveiðiflotans.  Samtökin minnast ekki orði á þá heildarniðurstöðu skýrsluhöfunda, að strandveiðarnar hafi tekist vel.

Þórðargleði LÍÚ er pínleg.  Í bölmóði sínum tína samtökin til lægstu tölur úr skýrslunni og alhæfa út frá þeim.  Enginn fjölmiðill hefur séð ástæðu til að gera sjálfstæða athugun á þessari framsetningu, þrátt fyrir að hún komi frá óskammfeilnustu hagsmunagæslumönnum á Íslandi.

Þetta eru mennirnir sem moka rándýrum mannamat í formi makríls og annarra uppsjávarfiska í bræðslur landsins til að fóðra niðurgreidda svínakjafta innan Evrópusambandsins og eldislaxa utan þess.

Þetta eru mennirnir sem hausa að stærstum hluta þorskinn fyrir aftan eyrugga um borð í frystitogurunum sínum og hafa til dagsins í dag komið sér undan því að vigta aflann inn á vinnslulínurnar í skipunum, þrátt fyrir að tæknin sé fyrir löngu til staðar.

Þetta eru mennirnir sem gengu eins og villidýr um Smuguna norðan Noregs á sínum tíma og heimtuðu aflaheimildir fyrir afrekin.  Og fengu.  Tala engu að síður um Norðmenn eins og þeir séu djöflar í mannsmynd.

Ekki nema vona að þeir ætlist til að mark sé á þeim tekið.

Kaflinn úr skýrslu Háskólaseturs Vestfjarða um gæði aflans af strandveiðiflotanum sl. sumar hljóðar svo, orðrétt:

,,Mat forsvarsmanna fiskmarkaða og fiskkaupenda á gæðum fisks af strandveiðum var mjör mismunandi. Meirihluti þeirra taldi þó að gæði strandveiðiafla stæðist vel samanburð við annan afla ... Töldu 56% að gæðin stæðust samanburð, eða 66% þeirra sem tóku afstöðu.  Niðurstöður eru svipaðar fyrir svæði A, B og D, en á svæði C voru 70% viðmælenda á því að gæðin stæðust vel samanburð, eða 87% þeirra sem tóku afstöðu.“

Ég hafði samband við Sigríði Ólafsdóttur, sem hafði yfirumsjón með skýrslunni og ritstýrði henni.  Ég bað hana um undirliggjandi gögn að baki ,,gæðaspurningunni“.  Í svari hennar kom eftirfarandi fram:

,,23% fiskkaupenda töldu að aflinn stæðist illa samanburð við annan afla.  Einungis 8 einstaklingar standa á bak við þessa prósentutölu.  6 af þessum 8 eru handhafar kvóta (75%)“.

Þá hafði ég samband við Veiðieftirlitið og spurði hvort þeirra menn hefðu orðið þess sérstaklega varir að gæði afla strandveiðibátanna hefðu skorið sig í einhverju frá öðrum afla á sama tíma.  Svo reyndist ekki vera.

Við hvorugan aðilann hafði LÍÚ, né fjölmiðlar, haft samband.

LÍÚ má eiga sína túlkun fyrir sig.  En mikið eiga þessir menn bágt.  Skýrslan afhjúpar aumkunarverðan blekkingarleik LÍÚ.  Þeir töldu sig hafa fundið snöggan blett á strandveiðunum og eins og hungraðir úlfar réðust þeir á hann.

Frá því Landssamband smábátaeigenda hóf göngu sína hef ég ótal sinnum orðið vitni að þessum vinnubrögðum.  Eitt sinn neituðu þeir t.d. að taka þátt í ráðstefnu erlendis vegna þess að undirrituðum var einnig boðið á hana.

Í seinni hluta þessara skrifa tek ég til umfjöllunar ályktun aðalfundar LÍÚ 2009 um strandveiðarnar.


Höfundur er formaður Landssambands smábátaeigenda.

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...