Uppsagnir blasa við - sjávarútvegsráðherra á næsta leik - Landssamband smábátaeigenda

Uppsagnir blasa við - sjávarútvegsráðherra á næsta leik



Eftirfarandi grein eftir Örn Pálsson birtist í Fiskifréttum 4. mars sl.

„Það er mér nýtt sem framkvæmdastjóri Landssambands smábátaeigenda að spurt sé um réttindi sjómanna hvað varðar uppsagnir. Spurt er hvaða reglur gildi. Þar er réttur sjómanna misjafn eftir því hversu lengi þeir hafa starfað hjá sömu útgerð, eftir því hvaða ráðningakjör eru í gangi og svo framvegis.

Öllum sem spyrja um þessi atriði er það þungbært að þurfa í raun að spá í þessar reglur. Áhöfnin sem mest telur fjóra er sem einn maður og hefur í flestum tilvikum unnið lengi saman. Gengur samhent til starfa sem ein heild frá því lagt er úr höfn og þar til búið er að binda og ganga frá.

Spurt er: Hvað heldurðu að ráðherrann geri þegar tugir báta verða bundnir við bryggju, hundruð fiskverkafólks missir atvinnuna og kaupendur sem skipt hafa við viðkomandi í fjölda mörg ár fá ekki lengur hinn frábæra fisk? Hvað eiga þeir að segja viðskiptavinum sínum? 

 

Nóg er af þorskinum

Fiskverkafólkið á erfitt með að trúa því að nú sé löndun brátt lokið. Veiðiheimildir sem sparaðar hafa verið frá upphafi fiskveiðiársins nánast uppurnar. Leigumarkaðurinn botnfrosinn og því verði bátnum lagt innan skamms. Atburðarrásin á sér stað í umhverfi þar sem sjómenn segja að aldrei hafi verið jafn auðvelt að veiða þorsk og nú. Fiskverkafólkið segir að fiskurinn hafi aldrei verið jafn vel haldinn. 

Því er ekki nema von að sá sem rýnir á uppsagnabréfið spyrji sig: Ég trúi ekki öðru en að ráðherra bæti við veiðiheimildir í þorski. Það er engin áhætta tekin, nóg er af þorskinum.

Endurtekið: Hvað heldurðu að ráðherrann geri til að koma í veg fyrir að þessi staða komi upp?

 

Rökin fyrir auknum þorskkvóta

Svar mitt er: Miðað við stöðuna sem nú er uppi á ráðherrann að auka veiðiheimildir í þorski. Þótt hann bæti við 40 þúsund tonnum mun það ekki kollvarpa því markmiði að stækka veiðistofninn. Með því yrði vöxturinn ekki eins hraður, en uppbygging engu að síður eins og lesa má út úr gögnum Hafrannsóknastofnunarinnar.   Það gæti þó allt eins breyst til betri vegar þar sem töluverðar líkur eru á að Hafrannsóknastofnun vanmeti þorskgöngur frá Grænlandi sem hafa verið viðvarandi frá 2007 og farið hafa vaxandi að sögn sjómanna.

Fjölmörg önnur rök fyrir ákvörðun um aukinn þorskkvóta er hægt að nefna: Aflabrögð með eindæmum góð, verð á fiski í sögulegu hámarki, staða þjóðarbúsins aldrei verri, atvinnuleysi það hæsta sem sögur fara af, skyndilokanir vegna smáfisks aldrei fleiri, ágreiningur sjómanna og fiskifræðinga um hversu mikið má veiða af þorski gríðarlegur, elstu menn muna ekki eftir að svo mikið beri á milli sjónarmiða þessara aðila.

 

Ráðherrann hefur valdið

Jón Bjarnason sjávarútvegs- og landbúnaðarráðherra hefur valdið.  Hann ræður hversu mikið skal veitt af þorski og öðrum tegundum sem veiði er takmörkuð á.  Ráðherrann veit að fiskifræðin er ung vísindagrein og mikil óvissa er í mati fiskifræðinga á stærð fiskistofnanna.  Sjávarútvegs- og landbúnaðarráðherra hefur fengið fjölmargar brýningar um að auka þorskkvótann. Hann hefur fengið skilaboð um að fyrirtæki eigi ekki um annan kost að velja en að loka og senda starfsfólkið heim verði kvótinn ekki aukinn.

Undir þeim kringumstæðum sem hér hefur verið lýst er afar mikilvægt að ráðherra bregðist við og meti að verðleikum þekkingu sjómanna, þeirra sem eiga allt sitt undir því að ganga varlega um auðlindina. Þeirra álit er skýrt, þorskstofninn þolir meiri veiði en Hafrannsóknastofnun hefur lagt til. Undir þau sjónarmið tók stjórn Landssambands smábátaeigenda á fundi 18. febrúar sl. þegar sú alvarlega staða sem upp er komin var rædd.

Samþykkt var að skora „á stjórnvöld að auka nú þegar verulega við veiðiheimildir í þorski, ýsu og öðrum helstu nytjastofnum bolfiska.  Veiðimenn hringinn í kringum landið verða varir við miklu meiri fiskgengd en skýrslur Hafrannsóknastofnunarinnar gefa til kynna.“.  

Jón Bjarnason sjávarútvegs- og landbúnaðarráðherra, þú átt næsta leik.“

 

Höfundur er framkvæmdastjóri Landssambands smábátaeigenda.

 

 

 

 

 

 

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...