Enn einn „glaðningurinn“ frá bankanum - Landssamband smábátaeigenda

Enn einn „glaðningurinn“ frá bankanum



Það var ekki gleði yfir trillukarlinum sem hafði samband við skrifstofuna fyrr í dag.  Hann hafði fengið bréf frá Landsbankanum þar sem tilkynnt er tugaprósenta hækkun á vaxtaálagi. 

 

Orðrétt segir í bréfi bankans:

„Í ljósi breyttra aðstæðna og hækkaðs fjármagnskostnaðar hefur NBI hf ákveðið að nýta sér heimild samkvæmt grein 3.5. í lánasamningnum og hækka vaxtaálag ofangreinds lánasamnings í 3,50% álag á Libor, eins og nánar er skilgreint í lánasamningnum.  Hækkunin tekur gildi frá og með næsta gjalddaga.“

 

„Er þetta aðferðin sem bankinn ætlar að nota til að aðstoða fyrirtæki í smábátaútgerð, að hegða sér eins og skepna?“, sagði viðmælandinn.  Nokkur fleiri orð féllu af vörum þessa manns, sem ganga öll lengra en það sem hér er vitnað í.   Hann var bæði sár og reiður útí bankann sinn sem hann hefur verið í viðskiptum við í tæp 40 ár.

 

Landssamband smábátaeigenda tekur heilshugar undir með umræddum smábátaeigenda og mótmælir harðlega ákvörðun Landsbankans um hækkun vaxtaálags. 

 

Í tölum er hér um að ræða 45,8% hækkun vaxtaálagsins.  Sé tekið mið af 100 milljón króna láni hækkar afborgun lánsins um 1,1 milljón á ári. 

 

 

 

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...