Hugmyndir kynntar um breyttar vigtarreglur, ísprósentu og slægingarstuðla

Fyrr í dag hélt boðaði sjávarútvegs- og landbúnaðarráðuneytið hagsmunaaðila til kynningarfundar um niðurstöðu starfshóps um tillögur að breyttum reglum um vigtun. 

Í kynningunni kom m.a. fram hjá Eyþóri Björnssyni fiskistofustjóra að ætlunin er með breytingunum að lækka kostnað og fækka áhættuþáttum sem leiða geta til rangrar vigtunar.  Endanleg vigtun mundi fara fram á hafnarvog.  Fastur frádráttur vegna íss yrði 4% hjá dagróðrabátum og 6% hjá útilegubátum.

Björn Ævarr Steinarsson sviðsstjóri á Hafrannsóknastofnun kynnti tillögur stofnunarinnar.  Meðal þeirra er að úthlutað aflamark yrði miðað við slægðan fisk.  Meginreglan yrði að landa aflanum slægðum.  Slóghlutfall fyrir þorsk yrði 10%.

Sveinn Margeirsson forstjóri MATÍS lagði áherslu á að tillögur til breytinga mundu fela í sér aukin gæði.   Hitastigsmælingar á aflanaum ættu t.d. að vera eðlilegur hluti við löndun.  Mikilvægt væri að hefja kælingu aflans strax niður að 0°C þannig væri hægt að tryggja geymslu fisksins í allt að 15 daga.

Flestir hagsmunaaðila sem til máls tóku á fundinum gagnrýndu hugmyndirnar og sögðu þær skref afturábak.

Framhald málsins er að hagsmunaaðilar munu skila inn til sjávarútvegs- og landbúnaðarráðuneytisins skriflegum athugasemdum.