Útgerð og fiskvinnsla á Ströndum að stöðvast - ráðherra hvattur til að grípa til aðgerða - Landssamband smábátaeigenda

Útgerð og fiskvinnsla á Ströndum að stöðvast - ráðherra hvattur til að grípa til aðgerða



Hagsmunaaðilar í Steingrímsfirði sendu nýverið Jóni Bjarnasyni sjávarútvegs- og landbúnaðarráðherra bréf þar sem þeir lýsa áhyggjum sínum varðandi aflaheimildir ýsu og erfiðs ástands á framsalsmarkaði.

 

Við Steingrímsfjörð á Ströndum starfa nú ríflega 20 smábátaútgerðir, þar eru tvö fyrirtæki með bolfiskvinnslu og fiskmarkaður.  Sem heild eru þessi fyrirtæki megin grunnstoð undir nærsamfélaginu þar eins og kemur fram í bréfinu. 

Vegna skorts á ýsukvóta er nú ekki lengur hægt að róa starfsemi því sjálf hætt þar til úr rætist. 

 

Fyrir nokkrum árum hefði ýsa ekki verið „vandamál“ í Húnaflóa, þorskurinn var yfirgnæfandi.  Af þeim sökum er kvóti bátanna að mestu þorskur, engin ýsa á þeirra slóð á viðmiðunarárum fyrir kvótasetningu.  Með vaxandi ýsugengd var hægt að bjarga sér með leigukvóta.  Nægt framboð var, litlar hömlur á framsali og verð viðunandi.  Á síðustu þremur fiskveiðiárum var ýsuafli þessara 20 útgerða fjórfaldur miðað við úthlutaðan ýsukvóta.  Alls leigðu þeir til sín rúm tvö þúsund tonn á þessum fiskveiðiárum, 2007 - 2009.  Sé tekið mið af meðalverði á leigukvóta á þessum tíma greiddu útgerðirnar um 200 milljónir fyrir þessar heimildir.

 

Vegna ofsafengins niðurskurðar á aflaheimildum í ýsu og framsalstakmarkana breyttist umhverfið á örskotsstundu.  Nánast ekkert framboð á ýsu til leigu og leiguverð rauk upp úr öllu valdi.  Það sem af er þessu fiskveiðiári hefur verðlagningin farið út fyrir allt velsæmi.  Söluverð ekki náð að standa undir leiguverði og kostnaði við veiðarnar.

Á yfirstandandi fiskveiðiári og fram til 8. janúar sl. höfðu viðkomandi útgerðir leigt til sín rúm 300 tonn og greitt fyrir rúmar 60 milljónir.  Nú er svo komið að útgerðirnar eru að stöðvast hver af annarri með tilheyrandi keðjuverkunum.  Þeir geta ekki nýtt þorskveiðiheimldir sínar þar sem ýsa veiðist alltaf með.

 

Bréf til Jóns Bjarnasonar sjávarútvegs- og landbúnaðarráðherra er því kall og krafa um tafarlausar aðgerðir til að koma i veg fyrir að atvinnulíf á Hólmavík og Drangsnesi lamist.  Næg ýsa er á slóðinni og er ráðherra hvattur til að bæta nú þegar við ýsukvótann og liðka þannig fyrir framsali.

 

Í lok bréfsins er það einlæg ósk bréfritara til alþingismanna að kynna sér betur aðstæður sjávarútvegs í landinu með tilliti til þeirra gríðarlegu verðmætasköpunar fyrir landið sem verður til vegna starfa alls þess fóks sem við sjávarútveginn vinnur.

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...