Lúðuveiðar - ráðist að aldagamalli veiðiaðferð

Sjávarútvegs- og landbúnaðarráðuneytið hefur samþykkt tillögu Hafrannsóknastofnunar að banna notkun haukalóða við lúðuveiðar.  Bannið tekur gildi frá og með 1. janúar 2012, sbr. reglugerð nr 477/2011.

LS mótmælir ákvörðun ráðuneytisins harðlega og lýsir yfir miklum vonbrigðum með að ekki hafi verið fallist á tillögur félagsins um rannsóknir á áhrifum sleppingar á lúðu styttri en 80 cm við styrkingu lúðustofnsins.

Ennfremur kemur fram í umsögn LS um málefnið að lúðuveiðimenn sem stundað hafa veiðar með haukalóðum sl. áratugi hafa upplifað stöðugleika í veiðunum bæði hvað magn og samsetningu afla varðar, en 90% af afla þeirra er lúða eldri en 10 ára.

Í umsögninni lýsti LS sig reiðubúið til samstarfs við SLR og Hafró um upplýsingagjöf frá sérfræðingahópi félagsins um lúðuveiðar og gríðarlegan upplýsingabanka um lúðu í N-Atlantshafi sem unnin hefur verið hjá Hafró í Nova Scotia.  Með útgáfu reglugerðarinnar var þessu samstarfi hafnað og kosið að beita henni til að kippa grundvellinum undan rekstri lúðuveiðibáta á grundvelli ónægra upplýsinga og þekkingar á að aðferðin skipti neinu máli varðandi framtíð lúðustofnsins og tillögugerð til styrkingar stofninum. 

Í lok umsagnarinnar krafðist „LS þess að gögn Hafrannsóknastofnunarinnar um stofnmælingu á lúðu verði yfirfarinn af hlutlausum aðilum.  Félagið efast um aðferðafræði stofnunarinnar að hægt sé að mæla stofnstærð útfrá veiðum á veiðarfæri sem ekki er notað við viðkomandi veiðar.“!

Sjá Umsögn LS - lúða.pdf í heild.