Grásleppuhrogn - vona að botninum sé náð - Landssamband smábátaeigenda

Grásleppuhrogn - vona að botninum sé náð




Allt frá því grásleppuhrogn byrjuðu að lækka í verði í lok vertíðar 2012, hefur gætt tregðu í sölu þeirra og verð sem fengist verið afar lág.  Útflutningstölur Hagstofunnar sýna þetta glöggt þar sem á fyrstu 10 mánuðum ársins er verð á söltuðum grásleppuhrognum 42% lægra en það var á sama tímabili í fyrra.  

Útflutningsverðmæti hrognanna á tímabilinu janúar - október er 554 milljónir á móti 1,1 milljarði í fyrra, en þess ber að geta að magnið hefur dregist saman um eitt þúsund tunnur.


Bent er á að þessi mikla verðlækkun eigi sér margar orsakir.  Meðal þeirra er að markaðurinn hafi ekki þolað þær skörpu verðhækkanir sem urðu á tímabilinu 2009 til 2010.  Verð hafi áfram haldist hátt fram yfir mitt ár 2012, þegar kaupendur kipptu að sér höndum.  Í kjölfarið hafi birgðir safnast upp og færst að vissu marki til sjómanna.  


Verðlækkun til sjómanna hefur einnig leitt til lægra verðs á fullunnum grásleppuhrognum - kavíarnum - og framan af minni framleiðslu.  Nú virðist hins vegar dæmið vera að snúast við og lægra verð til neytenda farið að skila sér í aukinni sölu.  Vonir standa því til að botninum sé náð og farið að grylla í betri horfur á markaði fyrir grásleppuhrogn.  Þannig að það gangi eftir veltur þó allt á að veiði á næstu vertíð verði á hóflegum nótum, að hún verði ekki umfram eftirspurn.


Grásleppa.png



 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...