Grjót í ýsunni - Landssamband smábátaeigenda

Grjót í ýsunni




Að undanförnu hefur ekkert lát verið á fréttum af góðum afla og mikilli ýsugengd á grunnslóðinni vítt og breitt um landið. Nýverið lögðust nokkrir  Strandamenn í rannsóknarvinnu.  Rannsókninni var beint að ýsu, hvort það ætti við rök að styðjast að meira væri af henni á miðunum en þorski og hvað hún væri að éta.


Farið var í róður og aflinn sem fékkst var 70- 80% ýsa en 20 - 30% þorskur. Það var því ekki um að villast, ýsan var allsráðandi á slóðinni.


Við blóðgun og slægingu þótti mönnum sem þyngd ýsunnar væri nokkru meiri en búast mætti við af stærðinni.  Við krufningu kom í ljós að hún hafði gleypt töluvert af grjóti.  Á myndinn sem hér fylgir má sjá rannsóknargögnin, væn gota og önnur innyfli og grjótið í öndvegi. Það má geta þess að meðalvigt þeirrar ýsu sem var með áberandi mest af grjóti í maganum var um og yfir fjögur kíló. 


Nú er spurt:

Hvers vegna er ýsan að gleypa grjót?   Það hlýtur að vera e-r tilgangur í því, enda er alltaf að koma betur og betur í ljós að fiskar búa yfir ágætum vitsmunum.


Nokkur svör bárust við vinnslu fréttarinnar:

  • Hún gerir það til að þyngja sig til að auðvelda sér að dýpka á sér.  

  • Hún er að flýta fyrir tímabærum dauðdaga

  • Grjótið fer óvart upp í hana með annarri fæðu

  • Ýsan hefur ákveðið að rugla um fyrir fiskifræðingum við stofnstærðarmælingar


Óskað er eftir skoðunum lesenda á þessu fyrirbrigði.


IMG_0435.JPG






1 Athugasemdir

Tvennt sem mér dettur í hug.

1. Hún gerir þetta eins og gæsin sem étur sand til að auðvelda meltinguna.
2. Hún étur steina til að sjúga/hreinsa lífverur af steinunum sér til matar.

En hvað veit ég ég er bara sjómaður og því talsvert mikið vitlaus að mati manna með þekkinguna, nefni engin nöfn eða starfsheiti.

 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...