Heimsveiði á grásleppu undir meðallagi - Landssamband smábátaeigenda

Heimsveiði á grásleppu undir meðallagi




Árlegur upplýsingafundur um grásleppumál - LUROMA - var haldinn í Kaupmannahöfn föstudaginn 5. febrúar sl.   Fundurinn var sá 28. í röðinni, en hann hefur verið haldinn árlega frá 1989. 

Landssamband smábátaeigenda hefur frá upphafi séð um skipulagningu og boðun þessara funda.  Alls voru þátttakendur á fundinum 34, en aðeins einu sinni áður hafa fleiri setið fundinn.   Fundarmenn komu frá 10 löndum.

Luroma label.png
Meðal þess sem kom fram á LUROMA 2016 var að heimsveiði á grásleppu í fyrra var nokkuð undir 10 ára meðaltali, sú þriðja minnsta á tímabilinu. 


Ísland með 57%

Ísland og Grænland eru leiðandi í veiðum á grásleppu og hafa verið það undanfarin 9 ár, eða frá því veiðar á Nýfundanlandi dróust verulega saman.  Veiði hér á landi skilaði hrognum í rúmar 12 þús. tunnur og á Grænlandi samsvaraði veiðin um 7.400 tunnum.  Alls var afli þessara tveggja þjóða 92% af heildarveiðinni.  


Grásleppunefnd fundar

Grásleppunefnd LS mun funda á morgun þriðjudaginn 9. febrúar, þar sem formaður og framkvæmdastjóri munu greina nefndinni frá Luroma 2016.  Í framhaldi af skýrslum þeirra mun nefndin reyna að leggja mat á horfur á næstu vertíð hvað varðar veiðimagn, markað fyrir grásleppu og grásleppuhrogn, ásamt veiðitíma.



 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...