LS fundar með atvinnuveganefnd Alþingis - Landssamband smábátaeigenda

LS fundar með atvinnuveganefnd Alþingis





Fyrr í dag funduðu forsvarsmenn LS með atvinnuveganefnd Alþingis.  Á fundinum var farið yfir helstu áherslumál félagsins sem viðkoma breytingum á lögum um stjórn fiskveiða og reglugerðum. Auk þessa var landssambandið kynnt, enda margir nefndarmanna á sínu fyrsta ári í þingmennsku. 
 

Mesta áhersla var lögð á strand- og makrílveiðar.   Einnig voru ræddar kröfur LS að auka heildarafla í þorski, um línuívilnun, byggðakvóta, veiðigjald og samþykktir aðalfundar.  Hafa ber í huga að framangreind upptalning er ekki tæmandi.


Hvað viðkemur strandveiðum var lögð áhersla á mikilvægi þeirra í að auka sátt um stjórnkerfi fiskveiða og fyrir hinar dreifðu byggðir, leið fyrir nýliða til að hefja útgerð.  Allir þessir þættir mundu eflast ef krafa LS um „fernuna“ (samfelldar strandveiðar í maí - ágúst, fjóra daga í viku) næði fram að ganga.  Þó afli mundi aukast yrði það ekki í beinu samhengi við fjölgun daga, þar sem sókn og viðhorf mundi gjörbreytast.   Að lokum var lögð áhersla á að strandveiðar hefðu ekki notið þeirrar aukningar sem orðið hefði á þorskkvótanum frá árinu 2011.   


Varðandi makrílinn var ítrekuð áhersla félagsins um að aflétta öllum veiðitakmörkunum á færaveiðar þar til hlutdeild smábáta í heildarafla nær 16%.


Fundurinn stóð í um klukkustund og spruttu fram góðar umræður.  Með fundinum hefur upplýsingum um áherslumál LS verið komið milliliðalaust til nefndarmanna í atvinnuveganefnd. Nefndar sem fjallar um málefni smábátaeigenda þegar þau eru til umræðu á Alþingi.

logo_LSx á vef.jpg
 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...