Er makríllinn að synda frá landinu? - Landssamband smábátaeigenda

Er makríllinn að synda frá landinu?





Á fundi LS og sjávarútvegsráðherra var rætt um makrílveiðar.  LS ítrekaði fyrri afstöðu sína um að ráðherra tryggði færabátum frelsi til veiða að 16% af leyfilegum heildarafla.  Ennfremur skoraði LS á ráðherra að afnema nú þegar reglugerð um kvótasetningu færabáta sem sett var árið 2015.  Hún hefði m.a. leitt til mikillar fækkunar smábáta á makrílveiðum.  Árið 2014 var fjöldi þeirra 121 en 2017 lönduðu 54 færabátar makríl.


Athygli vöktu upplýsingar LS um makrílveiðar á síðasta ári.  Þar kom fram að rúmur þriðjungur heildaraflans var veiddur utan íslenskrar lögsögu á alþjóðlegu hafsvæði NEAFC.
Tölur Fiskistofu sem stuðst er við tilgreina afla á hverju veiðisvæði og ná aftur til ársins 2014.      


Á síðustu 4 árum (2014-2017) hefur heildarafli í makríl verið um 164 þús. tonn.  Mestur hluti þess afla hefur veiðst hér við land.  Síðasta ár sker sig því úr þegar 35% heildaraflans veiddist utan landhelginnar.  Þegar þessar tölur eru skoðaðar er ástæða til að velta því fyrir sér hvort makríllinn sé að yfirgefa okkur.  Hvort minnkandi afli við landið séu vísbendingar um breytt göngumynstur?
  

MAKRÍLL

Leyfilegur afli

Afli í lögsögu

Afli á NEAFC

Afli Alls

2014

154.100

157.490

3.314

160.804

2015

179.833

148.280

19.507

167.787

2016

167.767

152.849

11.403

164.252

2017

176.192

105.253

58.668

163.921

2014-2017

677.892

563.872

92.892

656.764



Með skírskotun í framangreint gerist sú spurning enn áleitnari, hvers vegna stjórnvöld ákváðu með reglugerð að hefta makrílveiðar færabáta.  Þeirra veiðisvæði er við ströndina þ.s. stærri skipin hafa ekki heimild til að veiða, svæðin því að mestu ónýtt.  Að mati LS voru það gríðarleg mistök að grípa inn í það ferli sem hafið var í makrílveiðum smábáta.  
  



 

efnisyfirlit síðunnar

Hönnun og umsjón: GB hönnun ehf, Laugavegi 13, 101 Reykjavík, augl@smabatar.is

...