Minna veiðist af þorski - Landssamband smábátaeigenda

Minna veiðist af þorski




Að undanförnu hafa verið háværar raddir um að minna sé af þorski en verið hefur sl. ár.  


Strandveiðimenn upplifðu þetta á síðastliðnu sumri á þann hátt að erfiðara var að ná „skammtinum“ - 774 kg af þorski.  Það þurfti að hafa meira fyrir veiðunum.


Það sem af er fiskveiðiárinu hafa togarasjómenn látið heyra frá sér.  Þar eru notuð sterkari lýsingarorð.  Allt frá því að ekkert sé að hafa og niður í að ekki sé hægt að ganga að honum sem vísum, það þurfi að hafa fyrir þessu.  



Miðað við skýrslur Hafrannsóknastofnunar kemur þetta á óvart og vonandi að hér sé aðeins um tímabundið ástand að ræða.  



Við skoðun á aflatölum Fiskistofu staðfesta þær samdrátt hjá skipum í aflamarkskerfinu.  Veiðiheimildir á heilu fiskveiðiári á grundvelli hlutdeildar og þess sem fært var milli ára jukust um 5,2% (10.580 tonn) í aflamarki og 4,2% (1.924) í krókaaflamarki. 



Eins og sjá má í meðfylgjandi samantekt hefur þorskafli hjá skipum í aflamarki dregist saman um 3.835 tonn sem jafngildir -8,3%.  Þau höfðu á sama tíma í fyrra nýtt 22,7% af þorskveiðiheimildum sínum en nú er hlutfallið 19,8%.  


Nýttar heimildir í þorski 1. sept. -  8. nóvember

2019 / 2020

2018 / 2019

Aflamark

Krókaaflamark

Aflamark

Krókaaflamark

19,8%

17,5%

22,7%

16,3%

Afli [tonn]

42.209

8.396

46.044

7.534



Við skoðun einstakra veiðarfæra er samdráttur langmestur í dragnót.  Þorskveiði í voðina er 31% minni það sem af er fiskveiðiárinu miðað við sama tímabil í fyrra, jafngildir eitt þúsund tonnum.  Veiði í net er 18,5% minni, 10,3% á handfæri og 6,3% í botnvörpu.  Þorskveiðar á línu hafa hins vegar gengið betur það sem af er fiskveiðiárinu, þar er afli 3,2% meiri en hann var í fyrra.








 

efnisyfirlit síðunnar

...