Landssamband smábátaeigenda

Byggðakvóti - 27 óska eftir sérreglum

2012-02-01T23:29:59Z

Frestur sveitarfélaga til að skila til sjávarútvegsráðuneytisins óskum um sérreglur um byggðakvóta rann út nú um mánaðarmótin. Alls sendu 26 sveitarfélög ráðuneytinu tillögur um sérstök skilyrði við úthlutun byggðakvóta.

Fyrir nokkru birtist hér frétt um málefnið og er nú ljóst að enn bætist í hugmyndaflug sveitarstjórna um hvernig úthlutunarreglum skuli háttað. Til að mynda er það ósk Langanesbyggðar að bátar á Þórshöfn geti fengið byggðakvóta sem úthlutað er til Bakkafjarðar.

Það er ljóst að sjávarútvegs- og landbúnaðarráðuneytinu verður mikill vandi á höndum að verða við öllum þeim óskum sem borist hafa.

Rétt er að minna hér á að LS hefur lagt til breytingar á reglum um byggðakvóta sem mundi einfalda reglur og gera hann mun skilvirkari. Tillagan sem aðalfundur samþykkti er eftirfarandi:

Byggðakvóti verði afllagður í núverandi mynd, þess í stað verði hann

settur sem ívilnun til dagróðrabáta sem eiga heimahöfn í viðkomandi

byggðalögum og landa þar, (þ.e. byggðalögum úthlutað er frá

ráðuneytinu eftir þar til gerðum reglum).

Meðalaldur 43 ár

2012-01-30T23:57:22Z

LS hefur fengið lista frá Siglingastofnun um lögskráningu sjómanna á krókabátum á síðasta ári.

Alls voru 1.423 sjómenn skráðir á bátana og var meðalaldur þeirra 43 ár af þeim voru 40 konur. Flestir eru á aldursbilinu 40-49 ár 321 eða 23%, en 79% voru eldri en 20 ára og yngri en 60 ára.

Sjá nánar: Yfirlit lögskráninga 2011, krókabátar.xlsx.pdf

Á árinu 2011 voru 6.502 sjómenn lögskráðir á fiskiskip. Nánar er fjallað um lögskráningu á heimasíðu Siglingastofnunar.

Allt sem úthlutað var uppurið

2012-01-26T11:09:43Z

Eins og fram hefur komið á þessum vettvangi hafa ýsuveiðar það sem af er fiskveiðiárinu gengið vonum framar. Það hefði átt að koma sérfræðingum Hafrannsóknastofnunar á óvart og verða til þess að kafað væri ofan í forsendur ráðgjafarinnar. Bréf stofnunarinnar til sjávarútvegs- og landbúnaðarráðuneytisins um málefnið olli því vonbrigðum. Steingrímur J. Sigfússon sjávarútvegs- og landbúnaðarráðherra hefur nú málið til meðferðar þar sem hann er ekki bundinn af afstöðu Hafró.

Sjónarmið sjómanna og stofnunarinnar stangast á og því mikilvægt að ráðherra skoði málefnið sjálfstætt, þar sem fjölmargir fletir eru á því. Þar má nefna samsetningu á kvótanum milli þorsks og ýsu. Nánast útilokað að veiða þorsk öðruvísi en að fá ýsu með, sem kemur í veg fyrir fyllstu hagkvæmni við þorskveiðar. Aflatölur í ýsu segja því ekki allt um fiskgengdina þar sem bátarnir eru á stöðugum flótta undan ýsunni við þorskveiðar. Nánast engin ýsa í boði til leigu. Einnig er rétt að benda á að markaðir fyrir ýsu eru góðir og því engin hætta á verðlækkun þó kvótinn verði aukinn.

Við skoðun á ýsuafla einstakra útgerðarflokka eru krókaaflamarksbátar búnir að veiða tæpum eittþúsund tonnum meira af ýsu á fiskveiðiárinu heldur en þeir fengu úthlutað á grundvelli hlutdeildar, færslu milli ára og sérstakrar úthlutunar. Mismuninn hafa þeir að mestu brúað með leigukvóta úr stóra kerfinu og línuívilnun. Einnig hefur komið ýsa inn í veiðikerfi gegnum skiptimarkað Fiskistofu.

Ýsuafli krókaaflamarksbáta er 41% af því sem veiðst hefur á fiskveiðiárinu, rúman þriðjung hafa aflamarksskip veitt og togarar eru með 24%. Tölurnar eru unnar upp úr bráðabirgðatölum Fiskistofu.

Sjá nánar: Ýsuveiði 2011-2012.xlsx.pdf

Ýsa - gengur hratt á heimildir og meiri veiði

2012-01-24T23:20:29Z

Að undanförnu hefur mikið verið rætt um svar Hafrannsóknastofnunar við fyrirspurn sjávarútvegsráðherra um endurskoðun á ráðgjöf fyrir ýsu á fiskveiðiárinu. Sjómenn hafa haft samband við LS og tekið undir þau sjónarmið að forsendur ráðgjafarinnar séu ekki að ganga eftir. Mikið sé af ýsu á slóðinni og hún vel haldin.

Í síðustu ástandsskýrslu Hafró sem út kom í júní sl. segir m.a. um ýsuaflann:

„Á fyrstu sjö mánuðum yfirstandandi fiskveiðiárs (2010/2011 innsk. LS) var landaður afli 22% minni en á sama tímabili á síðasta fiskveiðiári, eða 33 þús. tonn.“

LS hefur tekið saman tölur um ýsuafla á yfirstandandi fiskveiðiári til og með 22. janúar sl. og borið saman við sama tímabil á síðasta fiskveiðiári. Í ljós kemur að samkvæmt bráðabirgðatölum Fiskistofu er ýsuafli nú 21.383 tonn á móti 20.820 tonnum í fyrra. Þó hér sé ekki um mikinn mun að ræða, hlýtur það að vekja upp spurningar hversu mikið hefur veiðst af ýsu í ljósi þess að heimildirnar nú eru rúmum 14% minni en í fyrra sem svarar til 7.646 tonna. Þegar horft er til þessara talna gengur því hratt á veiðiheimildir í ýsu, búið að veiða 47% nú á móti 39% í fyrra.

Eins og sjá má á þessum tölum hefur þróunin snúist við miðað við samanburð fiskveiðiáranna 2009/2010 og 2010/2011 og vitnað var til hér að framan. Ekki er því annað að sjá en ýsan sé farin að gefa sig betur en í fyrra og vonandi að áframhald verði á því næstu árin.

Ýsa um allt

2012-01-23T09:39:20Z

Í Fiskifréttum 12. janúar sl. situr Sigurgeir Þórarinsson frá Bolungarvík fyrir svörum sem „Karlinn í brúnni“. Sigurgeir sem um langt árabil hefur verið einn af aflahæstu skipstjórum smábátaflotans tjáir sig þar m.a. um aflabrögð og fiskveiðistjórnun.

Í viðtalinu við Fiskifréttir segir Sigurgeir eftirfarandi um ýsuna:

„Fram kom hjá Sigurgeir að þeir væru ekki að leggja sig sérstaklega eftir ýsu en hún veiddist alltaf með og oft í talsverðum mæli þótt farið væri á þekktar þorskslóðir. Í dag er helmingur aflans til dæmis ýsa. Erfitt er að sneiða hjá henni því hún er nánast um allt. Ég er því sammála Jóni Bjarnasyni, fráfarandi sjávarútvegsráðherra, um að nauðsynlegt sé að endurskoða grunninn í ráðgjöf Hafrannsóknastofnunar í ýsu. Ég tel alveg óhætt að veiða 60-70 þúsund tonn af ýsu. Einnig mætti auka þorskveiðar í 200 þúsund tonn,“ sagði Sigurgeir.“

Óska eftir sérreglum um byggðakvóta

2012-01-22T23:09:57Z

Alls hafa 17 sveitarfélög sent sjávarútvegs- og landbúnaðarráðuneytinu bréf og óskað eftir að sérstök skilyrði verði sett um úthlutun byggðakvóta. Óskir sveitarfélaganna eru afar mismunandi, margar lúta að löndunarskyldu, enn aðrar að löndun á sl. ári, osfrv.

Svo dæmi sé tekið er bréf sveitarstjórnar Kaldrananeshrepps.

„Fallið verði frá skilyrði um tvöföldun löndunarskyldu þess aflamarks sem fiskiskip fá úthlutað“

„Og skal öllum byggðakvóta landað til vinnslu í þorskígildum talið.“

„Ekki er heimilt að leigja frá sér úthlutaðan Byggðakvóta heldur skal hann allur veiddur og honum landað til vinnslu á Drangsnesi. Þó skulu heimil jöfn skipti á aflamarki í þorskígildum talið.“

Sjá nánar bréf sveitarfélaganna

Fiskistofa - rós í hnappagatið

2012-01-19T23:10:16Z

Á ráðstefnu innanríkisráðuneytisins og Skýrslutæknifélagsins - „Hvað er spunnið í opinbera vefi 2011?“ var tikynnt að Fiskistofa væri önnur tveggja stofnana hins opinbera sem bætt hefur vef sinn mest á sl. tveimur árum. Þá er vefur Fiskistofu í hópi 5 bestu ríkisstofnana á Íslandi.

Landssamband smábátaeigenda óskar Fiskistofu til hamingju með árangurinn.

Rétt er að nota hér tækifærið og benda lesendum á forvitnilega slóð á vef Fiskistofu þar sem hægt er sjá fyrirspurnir til stofunnar og svör við þeim.

SOS - spurt og svarað

Sjá nánar

Þorrablót trillukarla í Reykjavík

2012-01-18T21:29:51Z

Smábátafélag Reykjavíkur stendur fyrir Þorrablóti félagsmanna föstudaginn 27. febrúar n.k. Blótið verður á veitingastaðnum Höfninni við Suðurbugt.pdf, mæting er kl. 7, en klukkutíma síðar er áætlað að setjast að krásunum. Verðið er kr. 5.900.- á mann.

Flest svæðisfélaga Landssambands smábátaeigenda voru stofnuð 1985 og mörg þeirra hafa haft þann sið að halda annað hvort árshátíð, Þorrablót eða, eins og í tilfelli eins þeirra, haft á því reglu að halda erlendis með reglulegu millibili.

Hér að neðan er auglýsingin sem stjórn félagsins sendi frá sér.

Ýsa - Hafró svarar ráðuneytinu

2012-01-17T23:47:29Z

Í lok síðasta árs var fjallað um erindi sjávarútvegs- og landbúnaðarráðuneytisins til Hafrannsóknastofnunar um að stofnunin „skoði á nýjan leik grunn ráðgjafar sinnar hvað varðar ýsu“.

Hafrannsóknastofnun hefur nú svarað ráðuneytinu. Við lestur bréfsins er nokkuð ljóst stofnunin hefur ekki kafað djúpt í grunn ráðgjafarinnar hvað þá að leita eftir þróun á aflabrögðum það sem af er fiskveiðiárinu. Er það miður þar sem milljarðar eru í húfi.

Athyglisverður er sá kafli bréfsins sem fjallar um upplifun sjómanna varðandi þróun á stærð ýsustofnsins.

„Afli ýsu á sóknareiningu, samkvæmt afladagbókum, hefur farið minnkandi á undanförnum árum. Vegna breytinga í útbreiðslu ýsu er þessi minnkun þó mismikil eftir svæðum. Verulega hefur dregið úr afla á sóknareiningu á Suður- og Austursvæði en á grunnslóð norðanlands hafa aflabrögð verið nokkuð óbreytt undanfarin ár. Þannig geta breytingar á útbreiðslu haft áhrif á upplifun sjómannsins eða tilfinningu hans fyrir stærð stofnsins á hverjum tíma, háð því hvað veiðarnar eru stundaðar. Varasamt getur því verið að draga ályktanir um heildarstofnstærð út frá staðbundnum breytingum á aflabrögðum.“.

Í niðurstöðu bréfsins segir: „Í ljósi framangreinds telur Hafrannsóknastofnunin ekki ástæðu til endurskoðunar á tillögunum um aflamark í ýsu fyrir fiskveiðiárið 2011/2012.

Svar Hafrannsóknastofnunarinnar.pdf

Flotvarpan / úlfur í sauðagæru

2012-01-16T00:05:42Z

Landssamband smábátaeigenda hefur til fjölda ára lagst af miklum þunga gegn notkun flottrolls við uppsjávarveiðar inann fiskveiðilögsögunnar. Þessi gagnrýni hefur að mestu fallið í grýtta jörð í stjórnsýslunni, að ekki sé minnst á Hafrannsóknastofnunina.

Einhverjar rannsóknir hafa verið framkvæmdar hérlendis á flotvörpunni varðandi meðafla og möskvasmug. Þær rannsóknir hafa ekki leitt til mikilla breytinga varðandi notkun veiðarfærisins.

Mun meiri rannsóknir liggja fyrir erlendis, þótt fæst af því rati í fjölmiðla hérlendis. Á bloggi Níelsar Ársælssonar 12. janúar s.l. bendir hann á þetta með skýrum hætti. Bloggfærslan hans er eftirfarandi:

„Samkvæmt áralöngum ransóknum finnska vísindamannsins Petri Suuronen hjá Norsku Hafransóknarstofnunni drepur flottroll með smugi fiska 10 til 15 fallt það magn sem það veiðir og skilar að landi.

Flottroll splundrar fiskitorfum og ruglar göngumynstur þeirra til hryggninga og uppeldisstöðva.

Flottroll drepur auk þess sem meðafla gríðarlegt magn af bolfiski og seiðum ýmisa fiskitegunda sem síðan er brætt í mjöl og lýsi til skepnufóðurs.

Dæmi er um allt að 60 tonn af laxi hafi komið í einu holi í flottroll í lögsögu Íslands og verið kastað dauðum aftur í sjóinn.

Jón Eyfjörð Eiríksson var skipstjóri á Sighvati Bjarnasyni VE-81 frá Vestmannaeyjum. Í viðtali við Fréttablaðið árið 2006 sagði hann þá skoðun sína að flottroll séu varhugaverð veiðarfæri fyrir framtíð loðnustofnsins fyrir þær sakir að aðeins lítill hluti loðnunnar sem verður á vegi trollsins endar í pokanum en allt hitt vellur út um möskvana og því er óvíst hversu mikið af henni fer forgörðum.

Eins segir hann óvíst hvort loðnan þjappi sér saman aftur og haldi stefnu sinni eftir að búið er að ryðjast gegnum göngurnar með flottrollum.

Helgi kollegi hans deilir þessari skoðun með Jóni og einnig flestir skipverjar sem blaðamaður ræddi við um borð.

Þetta var heit umræða í Eyjum og Sigurgeir Brynjar Kristgeirsson, framkvæmdastjóri Vinnslustöðvarinnar sem á Sighvat Bjarnason, sagði að hann hljóti að hlusta á þessa gagnrýni sjómanna.

Umræðan um skaðsemi flottrollsins þagnaði nánast á sömu stundu og viðtalið við áhöfnina í Eyjum kom fram og ekki hefur verið minnst á þetta síðan.“

Færslan hefur vakið nokkur viðbrögð, eins og sjá má ef farið er inn á færsluna

http://www.dv.is/blogg/niels-arsaelsson/2012/1/12/skadsemi-flottrolls-vistkerfi-sjavar-vid-veidar-uppsjavarfiski/

Eins eru menn hvattir til að kynna sér skýrsluna sem hann vitnar til, en hún er í heild sinni hér:

http://books.google.is/books?id=TJSx-oqwajcC&printsec=frontcover&hl=is#v=onepage&q&f=false

Myndin sýnir stærðarhlutfall með þekktar byggingar sem viðmið. Litla þústin til hægi er Hallgrímskirkja.

Ýsuvandræði á Ströndum

2012-01-12T21:53:19Z

Strandir hafa ítrekað ársgamalt erindi sitt um auknar veiðiheimildir í ýsu. Staðan hjá útgerðum á Ströndum nú er síst betri en á sama tíma í fyrra og það þrátt fyrir að skiptimarkaður hafi nýst þeim vel í lok síðasta árs.

Það sama verður hins vegar ekki uppi á teningunum á næsta uppboði þar sem útgerðir eru ekki aflögufærar með þorsk í skiptum fyrir ýsu.

Strandir skora á Steingrím J. Sigfússon sjávarútvegs- og landbúnaðarráðherra að auka ýsukvótann og liðka til fyrir framsalinu bæði í þorski og ýsu.

Guðmundur Halldórsson í viðtali við Morgunblaðið

2012-01-11T18:27:21Z

„Guðmundur heiti ég Halldórsson“ er hin hefðbundni máti kempunnar úr Bolungarvík er hann heilsar mönnum, hvort sem þeir þekkja hann eða ekki. Smábátaeigendur eiga honum meira upp að unna en flesta þeirra grunar. Hann hefur verið óþreytandi baráttumaður fyrir öflugri smábátaútgerð sem og bættum hag hinna smáu og dreifðu sjávarbyggða. Röddin hans er full sannfæringar og eldmóðs, djúp með urgandi brimsogið í bakgrunni. Það er aldrei lognmolla þar sem sá gamli er á ferð. Morgunblaðið tók heilsíðu viðtal við Guðmund s.l. föstudag og sem fyrri daginn er hann ekkert að pakka hlutunum í fyrirferðamiklar umbúðir. Viðtalið, sem Ágúst Ingi Jónsson tók, var undir fyrirsögninni „Línuívilnun var lykillinn“, og fer hér á eftir:

Línuívilnun var lykillinn

Vinna Baldur Ingimarsson við beitingu í Bolungarvík, en yfir 60 manns hafa þann starfa.

„Nú er gott að búa í Bolungarvík,“ segir Guðmundur Halldórsson, tæplega áttræður eldhugi og skipstjóri, sem enn rær í strandveiðikerfinu. „Línuívilnunin var lykillinn að nýrri uppbyggingu hér í plássinu og hefur skipt sköpum fyrir mörg minni byggðarlög. Nú er verið að byggja þrjá 15 tonna báta fyrir útgerðir í plássinu og það er hugur í fólki,“ segir hann.

Út úr samantekt Fiskistofu má lesa að útgerðir í Bolungarvík hafa haft verulegan ávinning af línuívilnun síðastliðin átta ár. Niðurstaðan er sú að Bolungarvík hafi fengið 1360 tonn af steinbít á þennan hátt, 1560 tonn af ýsu og tæplega 2300 tonn af þorski. Á meðalverði á fiskmarkaði á síðasta ári gæti verðmætið numið um 1650 milljónum króna og munar um minna.Guðmundur rifjar upp að um aldamótin hafi verið farið að skerðast um aflaheimildir í Bolungarvík Þegar ýsa og steinbítur hafi verið kvótasettar árið 2001 hafi öll sund virst lokuð. Línuívilnun hafi komið í umræðuna og árin í kringum aldamótin hafi margvísleg barátta verið fyrir framtíð atvinnulífs víða á landsbyggðinni.

Með neyðarblys á Austurvelli

„Við reyndum allt til að vekja athygli á málstað okkar, því tilveruréttur byggðarlaganna var í hættu. Þetta var upp á líf eða dauða,“ segir Guðmundur. „Eitt árið stóðum við sjóklæddir á Austurvelli með brennandi neyðarblys, í annað skipti stóð ég fyrir fjölmennum fundi á Ísafirði og loks sá ég að ég þyrfti að vinna þetta mál á vettvangi Sjálfstæðisflokksins. Þar var tillaga um línuívilnun naumlega felld í sjávarútvegsnefnd eins landsfundarins, en ég gafst ekki upp og bar tillöguna um línuívilnun upp á sjálfum landsfundinum. Þar hafði ég sigur og ég var stoltur af flokknum. Hjólin fóru að snúast, þrátt fyrir öfluga andstöðu LÍÚ og fleiri.“

Guðmundur er ánægður þegar hann lítur til baka og aðrir kunnu að meta dugnað hans. Hann var kjörinn Vestfirðingur ársins eitt árið og heiðursfélagi í Landssambandi smábátaeigenda og Eldingu, smábátafélaginu á Vestfjörðum.

Bátarnir öflugir og öruggir

Flestir þeir bátar sem róa frá Bolungarvík eru undir 15 tonnum og eru í dagróðrum. Línan er beitt í akkorði í landi og starfa 60-70 manns við beitinguna. Guðmundur segir ekki hafa verið vandamál að fá fólk til þeirrar vinnu, einkum Íslendinga, en einnig útlendinga og hafi sumt af þessu fólki aldrei unnið önnur störf en við beitingu. Um borð í bátunum eru tveir hverju sinni, en gjarnan eru þrír í áhöfn og þá alltaf einn í tveggja daga fríi.

„Bátarnir eru í raun ekki margir, en héðan er hörð sjósókn eins og alltaf hefur verið og róið flesta daga,“ segir Guðmundur. „Sjómennirnir eru góðir og bátarnir öflugir og öruggir, þvert á það sem spáð hafði verið. Þeir eru flestir byggðir hér innanlands, sem er atvinnuskapandi öndvert við það sem gerist með stærri skipin. Nú er verið að smíða þrjá nýmóðins 15 tonna báta fyrir Bolvíkinga og þessir hraðskreiðu bátar hafa stækkað heimamiðin okkar. Hvert löndunarmetið hefur verið slegið af öðru og höfnin hér hefur verið rekin með hagnaði þó svo að héðan séu nánast eingöngu gerðir út minni bátar.

Talsvert og vaxandi magn er unnið í fiskvinnslunni hér, en ég viðurkenni að það er blóðugt að sjá um sjö þúsund tonnum keyrt í burtu til vinnslu annars staðar eða beint í útflutning,“ segir Guðmundur. Auk heimabáta hafa m.a. línubátar af Snæfellsnesi landað í Bolungarvík. Beittum línubölum er þá ekið vestur og farmur bílanna er svo nýveiddur fiskurinn.

Lottó og línuívilnun

Guðmundur segist enn vera litinn hornauga af ýmsum í stórútgerðinni en segist ódeigur í að verja línuívilnunina: „Við fáum það alltaf í hausinn að ívilnunin sé tekin af öðrum,“ segir Guðmundur. „Þeir sem mest kvarta undan þessu fengu makrílinn, kolmunnann og gulldepluna á silfurfati á síðustu árum. Uppsjávarfiskurinn, sem gefur mikinn hagnað, kemur að mjög litlu leyti á land á Vestfjörðum. Þeir fengu lottóvinning, sem hefur gert mörg fyrirtæki öflug, en við fengum línuívilnunina, sem byggt hefur upp atvinnulífið hér í Bolungarvík og víðar,“ segir Guðmundur.

Hann segir að auk byggðastefnu og atvinnusköpunar hafi rökin fyrir línuívilnun einkum verið þau að styðja við minni sjávarpláss og leyfa þeim sem búa þar að njóta heimamiðanna. Með landbeittri línu njóti byggðarlagið afla dagróðrabáta af nærmiðum og hafi Bolvíkingar margir tekið beitingavélar úr bátunum. Þetta sé öndvert við það sem margir bátar með beitingarvél ástundi, en þeir veiði gjarnan í sig á fjórum til fimm dögum þar sem mestur afli er hverju sinni og færi sig síðan um set.

Guðmundur segir óvissu í fiskveiðistjórnun og óttast hugmyndir um að afnema línuívilnun: „Ef kvótakerfið verður áfram og það litla sem þessar litlu byggðir þó fá verður tekið af líst mér ekki á blikuna. Kvótakerfið gengur ekki nema litlu byggðirnar fái að njóta nærmiðanna. Ég held að þingmenn, ekki síst ýmsir þingmenn þessa kjördæmis, ættu að staldra aðeins við og hugsa hvert þeir vilja fara með þessar byggðir.“

Baráttumaður Guðmundur Halldórsson staldrar við á bryggjunni í Bolungarvík í blíðunni í gær. Sjálfur rær hann í strandveiðikerfinu.

Strandveiðar - skora hátt á fiskmörkuðunum

2012-01-10T23:57:33Z

Þorskur veiddur á handfæri sem seldur var á fiskmörkuðum jókst um þriðjung í magni á nýliðnu ári 2011 frá 2010. Hlutur þeirra var rúmur fjórðungur alls þorsk sem þar var seldur. Fullyrða má að hin mikla aukning komi frá strandveiðum.

Mest var selt af þorski sem veiddur var á línu 37,1% heildarmagnsins, sem var um 2.800 tonnum minna en á árinu 2010.

Sjá nánar þorskur á mörkuðum.pdf

Tafla unnin upp úr tölum á RSF

Ýsan bíður til febrúars

2012-01-09T21:54:57Z

Sjávarútvegs- og landbúnaðarráðuneytið hefur ákveðið að engin skipti með aflamark verði í janúar. Margir bjuggust við að ýsu sem hefur verið skilað vegna jöfnunarheimilda og komin er umfram það sem ætlað var til potta yrði boðin í skiptum öðru sinni nú í janúar. SLR taldi hins vegar rétt að bíða til febrúars enda búist við að mikið af ýsu komi inn í þessum mánuði frá skipum sem láta ýsu í stað úthlutunar í deilistofnum.

Byggðakvóti - Þorlákshöfn, Sandgerði og Hornafjörður

2012-01-06T16:15:06Z

Sjávarútvegs- og landbúnaðarráðuneytið hefur birt forsendur byggðakvóta yfirstandandi fiskveiðiárs.

Við samanburð á sambærilegum forsendulista fyrir sl. fiskveiðiár kemur í ljós að þrjú byggðar- og sveitarfélög eru ný á listanum í ár. Það eru Þorlákshöfn - 300 tonn, Sandgerði - 101 tonn og Hornafjörður með 86 tonn.

Sjá lista: Forsendur fyrir byggðakvóta